بۇگىن – دۇنيەجۇزىلىك ادام قۇقىقتارى كۇنى، دەپ حابارلايدى "ادىرنا" ءتىلشىسى.
1948 جىلعى جەلتوقساننىڭ ونىنشى جۇلدىزىندا بۇۇ باس اسسامبلەياسى جالپىعا بىردەي ادام قۇقىقتارى دەكلاراتسياسىن قابىلدادى. بۇل كۇن بارلىق ەلدە 1950 جىلدان بەرى اتاپ وتىلۋدە.
قازاقستان اتا زاڭىندا مەملەكەتتىڭ ەڭ قىمبات قازىناسى - ادام جانە ادامنىڭ ءومىرى، قۇقىقتارى مەن بوستاندىقتارى ەكەنى اتاپ كورسەتىلگەن.
ادام قۇقىقتارى مەن بوستاندىقتارى تەك قانا ءبىر مەملەكەتتىڭ ءىسى ەمەس. ول بۇكىل حالىقارالىق بىرلەستىكتىڭ سۋبەكتىسى رەتىندە سانالادى. مەملەكەت باسشىسى قاسىم-جومارت توقاەۆ ءوز جولداۋىندا ادام قۇقىعىن قورعاۋ ماسەلەسىن ساياسي جاڭعىرۋمەن قاتار قويعان.
ال پارلامەنت پالاتالارىنىڭ بىرلەسكەن وتىرىسىندا:
"ادامي كاپيتالدىڭ ساپاسىن دايەكتى تۇردە ارتتىرۋ قاجەت. بۇل ماسەلەگە ەرەكشە نازار اۋداراتىنىمدى بىلەسىزدەر. قازاقستاننىڭ باستى بايلىعى – ادامدار ەكەنىنە سەنىمدىمىن. بۇل ادامدار، ولاردىڭ ءبىلىمى مەن قۇزىرەتتىلىگى، ءبىزدىڭ ەلىمىزدىڭ العا جىلجۋىنىڭ نەگىزگى قوزعاۋشى كۇشى بولىپ تابىلادى", - دەدى پرەزيدەنت.
كونستيتۋتسيانىڭ 15-بابىندا اركىمنىڭ ءومىر سۇرۋگە قۇقى بار ەكەنى جازىلعان. دەمەك كەز كەلگەن مەملەكەت ەڭ الدىمەن ەلدە تۇراتىن ازاماتتىڭ جايلى ءومىر سۇرۋىنە جاعداي جاساۋى ءتيىس. ادامنىڭ ساياسي، الەۋمەتتىك، ەكونوميكالىق، مادەني، ءتىپتى ەكولوگيالىق قۇقىقتارىن ەسكەرىلۋى ءتيىس.
