مەملەكەت باسشىسى قاسىم-جومارت توقاەۆ ەلوردانىڭ يندۋستريالىق پاركىندەگى جەتەكشى كاسىپورىندارمەن تانىستى. بۇل تۋرالى اقوردا جازدى، دەپ حابارلايدى «ادىرنا» ءتىلشىسى.
پرەزيدەنت استانانىڭ ماڭىزدى نىساندارىن ارالاۋدى، الدىمەن، №1 يندۋستريالىق پاركتەن باستادى. مۇندا مەملەكەت باسشىسىنا ەلوردانىڭ ينۆەستيتسيالىق تارتىمدىلىعى جونىندە مالىمەت بەرىلدى.
استانا قالاسى اكىمىنىڭ ورىنباسارى ەۆگەني گلوتوۆتىڭ بايانداۋىنشا، العاشقى جارتىجىلدىقتا ەلوردانىڭ ايماقتىق جالپى ءونىمىنىڭ كولەمى 4,7 تريلليون تەڭگەنى قۇراعان. ءوسىم كورسەتكىشى – 4,1 پايىز. ءاجو قۇرىلىمىنداعى ۇلەستىڭ باسىم بولىگى، ياعني 73 پايىزدان استامى شاعىن جانە ورتا بيزنەسكە تيەسىلى. ال ينۆەستيتسيانىڭ ۇلەسى – 11,5 پايىز.
ينۆەستيتسيا تارتۋ ىسىندە №1 يندۋستريالىق پارك ايرىقشا ءرول اتقارادى. مۇندا جالپى ينۆەستيتسيا سوماسى 322 ميلليارد تەڭگە بولاتىن 100 جوبا جۇزەگە اسىرىلىپ جاتىر. پارك ءوندىرىس اۋقىمى جاعىنان رەسپۋبليكادا ءبىرىنشى ورىن الادى. ىسكە قوسىلعان ساتتەن بەرى ءوندىرىس الاڭىندا 6,7 تريلليون تەڭگەنىڭ ءونىمى شىعارىلعان.
پرەزيدەنت ەلوردانىڭ دامۋىنا ءىرى ءوندىرىس ورىندارى اسا قاجەت ەكەنىن ايتتى.
– استانا حالقىنىڭ سانى ءوسىپ كەلەدى. تاياۋ جىلدارى 1,5-2 ميلليون ادامعا جەتۋى مۇمكىن. سوندىقتان تۇرعىنداردى، جاستاردى جۇمىسپەن قامتاماسىز ەتۋىمىز كەرەك، – دەدى قاسىم-جومارت توقاەۆ.
