تۇركىستاندا 19 جاڭا كوپقاباتتى ءۇي جىلۋسىز قالدى. ۇيلەردىڭ بىرىندە قۇبىرلار جارىلىپ، 7 قاباتتى سۋ باستى، دەپ حابارلايدى «ادىرنا» ۇلتتىق پورتالى كتك تەلەارناسىنا سىلتەمە جاساپ.
قاتتى جەلدىڭ سالدارىنان ءبىر ءۇيدىڭ شاتىرى جۇلىنىپ، قۇبىرلار سۋىققا شىداماي، جارىلىپ كەتكەن. تۇرعىنداردىڭ ايتۋى بويىنشا، 12-ءشى قاباتتان 5-ءشى قاباتقا دەيىنگى پاتەرلەردى سۋ باسقان. ارنا تىلشىلەرىنىڭ مالىمەتىنشە، مۇنداعى «قىمبات» ۇيلەر پايدالانۋعا بيىل بەرىلگەن.
بۇل ۇيلەردى سالعان مەردىگەرلەر قازىردىڭ وزىندە كەلىپ، ەرتەڭ ءبارىن قالپىنا كەلتىرەمىز دەپ حالىققا ۋادە بەردى. سونداي-اق ولار كەلتىرىلگەن شىعىندى وتەۋدەن باس تارتقان جوق. بىراق وبلىس اكىمىنە قاراما-قارسى تۇرعىزىلعان 13 كوپقاباتتى ءۇيدىڭ جاعدايى جاقسى ەمەس. مۇنداعى پاتەرلەر كەزەكتە تۇرعاندارعا تاراتىلعان. جەل ۇيلەردىڭ قاسبەتتەرىن (فاساد) جۇلىپ اكەتكەن. تۇرعىنداردىڭ ايتۋىنشا، ولاردىڭ ۇيلەرى وتە سۋىق.
«ءبىر جەردە قۇبىر جارىلىپ كەتىپتى، سونى جوندەيمىز، سوسىن جىلۋ بەرەمىز دەپ ۋادە بەردى. ازىرشە كيىنىپ ءجۇرمىز. مىنە، وسىلاي قالپاقپەن ساباق بەرەمىز. سونداي-اق ۇيىقتاعاندا دا قالپاقپەن ۇيىقتايمىز»، - دەيدى ازامات جۇرناباەۆ.
بۇل ۇيلەردىڭ تۇرعىندارى بالالارىنىڭ دەنساۋلىعىنا الاڭداۋلى. ال شەنەۋنىكتەر ۇيلەردە تەك ءبىر تاۋلىككە عانا جىلۋ جوق دەپ سەندىرەدى. بىراق قازىرگى جاعدايدىڭ ىڭعايلى ەمەس ەكەنىنە دە كەلىسەدى. ولار نەلىكتەن جىلۋدىڭ حالىققا جەتپەي جاتقانىن انىقتاپ جاتىر، مۇمكىن، ساپاسىز قۇرىلىستىڭ سالدارىنان دەپ بولجايدى. سونىمەن قاتار ۇيلەردىڭ جەلدەن جىرتىلعان جابىندارى قالپىنا كەلتىرىلگەندە، جىلى بولادى دەپ سەندىرەدى.
«ادىرنا» ۇلتتىق پورتالى
