بۇگىن – جەلتوقسان قۇرباندارىن ەسكە الۋ كۇنى، دەپ حابارلايدى "ادىرنا" ءتىلشىسى.
17 جەلتوقسان - 1986 جىلى جەلتوقسان وقيعاسىنا قاتىسقانداردى ەسكە الۋ كۇنى. قازاق حالقىنىڭ ازاماتتىق جانە ساياسي پوزيتسياسىن ايقىن اڭعارتا بىلگەن، ەل ەسىندە "86-نىڭ جەلتوقسانى" دەگەن اتپەن قالعان قاندى قىرعىندا وپات بولعان جاستاردىڭ ارۋاعىنا سىيىنىپ، قۇران وقىلادى.
جەلتوقساننىڭ 17-ءى كۇنى تاڭەرتەڭگى ساعات 8-دە قالاداعى سول كەزدەگى ل.ي.برەجنەۆ اتىنداعى الاڭعا (رەد. قازىرگى رەسپۋبليكا الاڭى) ساياسي تاۋەلسىزدىكتى تالاپ ەتكەن ۇرانمەن 300-دەي ادام جينالعان بولاتىن. سول كۇنى كەشكىسىن ەرەۋىلشىلەر سانى 20 مىڭعا جەتكەن.
جەلتوقسان كوتەرىلىسى قۇرباندارىنىڭ قاتارىندا ە.سىپاتاەۆ، س.مۇحامەدجانوۆا، ك.مولدانازاروۆا، ق.رىسقۇلبەكوۆ، م.ابدىقۇلوۆ، ل.اسانوۆا سىندى قازاق جاستارى بار.
سونداي-اق، 1991 جىلى 12 جەلتوقساندا قازاقستان رەسپۋبليكاسىنىڭ ەكس-پرەزيدەنتى نۇرسۇلتان نازارباەۆتىڭ "قازاقستانداعى 1986 جىلعى 17-18 جەلتوقسانداعى وقيعالارعا قاتىسقانى ءۇشىن جاۋاپتىلىققا تارتىلعان ازاماتتاردى اقتاۋ تۋرالى" جارلىعىنىڭ 4-تارماعى بويىنشا جەلتوقساننىڭ 17-ءسى "قازاقستان رەسپۋبليكاسىنىڭ دەموكراتيالىق جاڭارۋ كۇنى" دەپ جاريالاندى.
