بۇگىن - جەلتوقسان وقيعاسىنىڭ قۇربانى ەربول سىپاتاەۆتىڭ تۋعان كۇنى، دەپ حابارلايدى "ادىرنا" ءتىلشىسى.
1986 جىلعى جەلتوقسان كوتەرىلىسى تالاي بەلسەندىنىڭ ءومىرىن قىرشىننان قيدى. قازاق جاستارى الاڭعا ءولىم ىزدەپ ەمەس، ادىلدىك سۇراپ جينالعان. جەلتوقسانننىڭ مۇزدا جانعان الاۋى، ەلدىكتى كوزدەگەن جاس-بەلسەندىنىڭ ءبىرى - ەربول سىپاتاەۆ. ول تۋرالى دەرەكتەر وتە از بولعانىمەن حالىقتىڭ جۇرەگىندە ساقتالعان.
ەربول سىپاتاەۆ - الماتى وبلىسى سول كەزدەگى پانفيلوۆ اۋدانى ەڭبەكشى اۋىلىندا 1964 جىلى دۇنيەگە كەلدى. جەلتوقسان كوتەرىلىسى تۇسىندا الماتىنىڭ ەنەرگەتيكا ينستيتۋتىنىڭ 2-ءشى كۋرسىندا وقىعان.
"قازاقكسر جوعارعى سوۆەتى پرەزيدۋمىنىڭ الماتى جانە قازاقستاننىڭ وزگە وبلىستارىنداعى 1986 جىلعى جەلتوقسان وقيعالارىنا ءتيىستى باعا بەرۋ جونىندەگى كوميسسيا كورىتىندىسى" بويىنشا دەرەكتەردە:
"تاعى ءبىر قايعىلى جاعداي — الاڭدا باسىنان جاراقاتتانىپ، كەيىن قازا بولعان الماتى ەنەرگەتيكا ينستيتۋتىنىڭ ستۋدەنتى ە.م. سىپاتاەۆتىڭ ءىسى. ونىڭ اكە-شەشەسى جوق، تۋىسقاندارى عانا بار. بىراق ولار الماتىعا شاقىرىلماعان. قازا تۋرالى انىقتامانى اۋرۋحانادان مقك قىزمەتكەرى الادى. سوسىن ول ميليتسيا قىزمەتكەرلەرىمەن بىرگە مۇردە سالىنعان تابىتتى تۋىسقاندارى تۇراتىن جەرگە الىپ جۇرەدى. ءتۇن ىشىندە كەلەدى، الدىن الا حابارلانعان تۋىسقاندارى ولاردى الدىنان شىعىپ كۇتىپ الادى. ولارعا جىگىتتى الاڭدا جارالى كۇيىندە تاۋىپ العاندارىن، اۋرۋحانادا ولگەنىن، ولتىرگەن ادامنىڭ بەلگىسىز ەكەنىن، قازىر بۇل ىسپەن پروكۋراتۋرا اينالىسىپ جاتقانىن تۇسىندىرەدى. پروكۋراتۋرا شىنىندا دا ءىس قوزعادى، بىراق ول ونىڭ ءولىمى تۋرالى ەمەس، وقيعالارعا قاتىسى جونىندە ەدى، «ايىپتالۋشىنىڭ» كازاسىنا بايلانىستى ءىس جابىلادى", - دەلىنگەن.
ەربول سىپاتاەۆ 1986 جىلى 23 جەلتوقساندا 22 جاسىندا اۋرۋحانادا جارىق دۇنيەمەن قوشتاستى. كوزى ءتىرى بولعاندا ول 60 جاسقا تولار ەدى.
ەربول سىپاتاەۆتىڭ تۋعان كۇنىنە وراي الماتى ەنەرگەتيكا جانە بايلانىس ۋنيۆەرسيتەتىندە 6 ناۋرىز كۇنى مارقۇمدى ەسكە الۋ كەشى ءوتتى. جيىنعا مارقۇمنىڭ تۋىستارى، قوعام قايراتكەرلەرى، الماتى قالالىق قوعامدىق دامۋ باسقارماسى باسشىسىنىڭ ورىنباسارى باعلان تولەۋحان، ۋنيۆەرسيتەتتىڭ وقۋ ءىسى جونىندەگى پرورەكتورى ايگۇل سارەنوۆا، الەۋمەتتىك پاندەر كافەدراسىنىڭ مەڭگەرۋشىسى بولات قابدۋشەۆ پەن جوو ستۋدەنتتەرى قاتىستى.
ەربول وقىعان كەزدە بۇل وقۋ ورىنى الماتى ەنەرگەتيكالىق ينستيتۋتى دەپ اتالاتىن.
شارادا ءسوز سويلەگەندەر مەملەكەتتەگى ماڭىزدى وقيعالار تۋرالى ەستەلىكتەرىمەن ءبولىسىپ، ەربول سىپاتاەۆتىڭ جانقيارلىعىن، سونداي-اق «پاتريوتيزم» ۇعىمىنىڭ سان قىرلى ءمانى بار ەكەنىن، ونىڭ ىشىندە تۋعان جەرگە دەگەن سۇيىسپەنشىلىك تۋرالى ءسوز قوزعادى.
"جەلتوقسان وقيعاسى بولعان جىلدارى ەربول سىپاتاەۆ ءبىزدىڭ الماتى ەنەرگەتيكا جانە بايلانىس ۋنيۆەرسيتەتىنىڭ 2 كۋرس ستۋدەنتى بولاتىن. ونىڭ تراگەدياسى بۇكىل ەلگە بەلگىلى. ارينە، ۋنيۆەرسيتەتىمىزدە ناعىز باتىر ەربول سىپاتاەۆتى ەسكە الىپ، ونىڭ ەسىمىن تاريحتا قالدىرۋ ءۇشىن قىرۋار ىستەر اتقارىلدى. ە.سىپاتاەۆ اتىنداعى وقۋ زالى اشىلدى. جىل سايىن ءبىز باتىردى ەسكە الىپ قانا قويماي، ءوزىنىڭ مىقتى ەرىك-جىگەرى مەن قايسارلىعىنىڭ ارقاسىندا ەرلىك پەن جانكەشتىلىكتىڭ ۇلگىسىنە اينالعان ەربول سىپاتاەۆتىڭ ەرلىگىن شاكىرتتەرىمىز بەن جاڭادان كەلگەن ستۋدەنتتەرىمىزگە ەسكە ءتۇسىرۋ ماقساتىندا ەسكە الۋ شارالارىن وتكىزۋگە تىرىسامىز", - دەدى الەۋمەتتىك پاندەر كافەدراسىنىڭ مەڭگەرۋشىسى بولات قابدۋشەۆ.
