Búgin - Jeltoqsan oqıǵasynyń qurbany Erbol Sypataevtyń týǵan kúni, dep habarlaıdy "Adyrna" tilshisi.
1986 jylǵy Jeltoqsan kóterilisi talaı belsendiniń ómirin qyrshynnan qıdy. Qazaq jastary alańǵa ólim izdep emes, ádildik surap jınalǵan. Jeltoqsannnyń muzda janǵan alaýy, eldikti kózdegen jas-belsendiniń biri - Erbol Sypataev. Ol týraly derekter óte az bolǵanymen halyqtyń júreginde saqtalǵan.
Erbol Sypataev - Almaty oblysy sol kezdegi Panfılov aýdany Eńbekshi aýylynda 1964 jyly dúnıege keldi. Jeltoqsan kóterilisi tusynda Almatynyń energetıka ınstıtýtynyń 2-shi kýrsynda oqyǵan.
"QazaqKSR Joǵarǵy Soveti prezıdýmynyń Almaty jáne Qazaqstannyń ózge oblystaryndaǵy 1986 jylǵy Jeltoqsan oqıǵalaryna tıisti baǵa berý jónindegi komıssııa korytyndysy" boıynsha derekterde:
"Taǵy bir qaıǵyly jaǵdaı — alańda basynan jaraqattanyp, keıin qaza bolǵan Almaty energetıka ınstıtýtynyń stýdenti E.M. Sypataevtyń isi. Onyń áke-sheshesi joq, týysqandary ǵana bar. Biraq olar Almatyǵa shaqyrylmaǵan. Qaza týraly anyqtamany aýrýhanadan MQK qyzmetkeri alady. Sosyn ol mılıııa qyzmetkerlerimen birge múrde salynǵan tabytty týysqandary turatyn jerge alyp júredi. Tún ishinde keledi, aldyn ala habarlanǵan týysqandary olardy aldynan shyǵyp kútip alady. Olarǵa jigitti alańda jaraly kúıinde taýyp alǵandaryn, aýrýhanada ólgenin, óltirgen adamnyń belgisiz ekenin, qazir bul ispen prokýratýra aınalysyp jatqanyn túsindiredi. Prokýratýra shynynda da is qozǵady, biraq ol onyń ólimi týraly emes, oqıǵalarǵa qatysy jóninde edi, «aıyptalýshynyń» kazasyna baılanysty is jabylady", - delingen.
Erbol Sypataev 1986 jyly 23 jeltoqsanda 22 jasynda aýrýhanada jaryq dúnıemen qoshtasty. Kózi tiri bolǵanda ol 60 jasqa tolar edi.
Erbol Sypataevtyń týǵan kúnine oraı Almaty energetıka jáne baılanys ýnıversıtetinde 6 naýryz kúni marqumdy eske alý keshi ótti. Jıynǵa marqumnyń týystary, qoǵam qaıratkerleri, Almaty qalalyq Qoǵamdyq damý basqarmasy basshysynyń orynbasary Baǵlan Tóleýhan, ýnıversıtettiń oqý isi jónindegi prorektory Aıgúl Sárenova, áleýmettik pánder kafedrasynyń meńgerýshisi Bolat Qabdýshev pen JOO stýdentteri qatysty.
Erbol oqyǵan kezde bul oqý oryny Almaty energetıkalyq ınstıtýty dep atalatyn.
Sharada sóz sóılegender memlekettegi mańyzdy oqıǵalar týraly estelikterimen bólisip, Erbol Sypataevtyń janqııarlyǵyn, sondaı-aq «patrıotızm» uǵymynyń san qyrly máni bar ekenin, onyń ishinde týǵan jerge degen súıispenshilik týraly sóz qozǵady.
"Jeltoqsan oqıǵasy bolǵan jyldary Erbol Sypataev bizdiń Almaty energetıka jáne baılanys ýnıversıtetiniń 2 kýrs stýdenti bolatyn. Onyń tragedııasy búkil elge belgili. Árıne, ýnıversıtetimizde naǵyz batyr Erbol Sypataevty eske alyp, onyń esimin tarıhta qaldyrý úshin qyrýar ister atqaryldy. E.Sypataev atyndaǵy oqý zaly ashyldy. Jyl saıyn biz batyrdy eske alyp qana qoımaı, óziniń myqty erik-jigeri men qaısarlyǵynyń arqasynda erlik pen jankeshtiliktiń úlgisine aınalǵan Erbol Sypataevtyń erligin shákirtterimiz ben jańadan kelgen stýdentterimizge eske túsirý maqsatynda eske alý sharalaryn ótkizýge tyrysamyz", - dedi áleýmettik pánder kafedrasynyń meńgerýshisi Bolat Qabdýshev.
