Ózi ómir súrip otyrǵan kezeńdegi keleńsizdikke azamat retinde ún qatqan jáne ózi óner adamy bolǵandyqtan qazaq qoǵamyna kereǵar oqıǵanyń bárine ánderi arqyly qarsylyq tanyta bilgen adamdy bilesizder me?
Bilemiz, biraq izdeı bermeımiz. Umytyp ketkenbiz.
Úlken saraılarda jylyna qanshama konert qoıylsa da, ony sahnadan kórmeımiz. Telearnalardan da solaı… Al shyndap kelgende Muqaǵalı bolyp Farıza aqynǵa muń shaqqan, jeltoqsan jeliniń yzǵaryn da, ana tiliniń aıbynyn da ózgeshe sezinip, áldıimen náreste Tolǵanaımen syrlasqan ánshi Ábıirbekti, kompozıtor Tinálıevti izdeýimiz kerek edi. “Qazaqstannyń Halyq artısi ataǵy qaıta beriletin boldy” degen áńgime shyqqanda Ábıirbek beınesi kólbeń ete qalǵany ras.
Óner – tabıǵat. Ol da kókteıdi. Búrshik atady. Ol baptaǵanǵa baılanysty. Baǵbannyń peıiline, kútýshiniń kóńiline táýeldi. Uly ónerdi jasaıtyndar da - solaı, eliniń eskergenin, eńbeginiń elengenin qalaıdy. Biraq ózdiginen ózeýrep alǵa entelemeıdi. Eshqashan… Men onyń ánderiniń “shań basqan arhıvterde” qalmaıtynyn bilem, óıtkeni jylda jeltoqsan aıynyń bir kúninde “Jeltoqsan jeli” ár qazaqtyń ishine “kirip” boıyn jylytyp, rýh syılap ótedi. Sahnalardan kórinbeı-aq, qalyń kórermenniń aldyna shyqpaı-aq ÁN bolyp oralady. 37 jyldan beri solaı!
Endeshe, “Qazaqstannyń Halyq artısi” degen ataqqa Ábıirbek Tinálıev laıyq. Al atalmysh ataqqa kıeli sahnany aıaǵymen ábden bylǵap, aýzymen ábden lastap ónerdiń qadirin ketirip, qutyn qashyrǵandardy jolatpaǵan jón. Beti jyltyrap ekrannan túspeıtinderdi emes, tasada qalǵan Ábıirbekteı daryndardyń shyǵarmashylyǵyn baǵalap, marapattaıyq. Talantsyzdardy tusaýlamasaq, tulpar men esektiń qatar turǵany kórer kózge de súıkimsiz kórinetini belgili. Endigi jerde óner adamdary soǵan abaı bolýymyz kerek. Arsyzdarǵa báribir bolǵanymen arly adamdar bıikke umtylatyn da kez jetti. Essizder alǵa shyǵyp, estiler keıin qalǵan kezeńdi artqa tastar ýaqyt keldi ǵoı dep oılaımyn.
Bekjan Turys
