«ادىرنا» ۇلتتىق پورتالىنىڭ YouTube ارناسىنا بەرگەن سۇحباتىندا زەرتتەۋشى بولاتبەك تولەپبەرگەن 1986 جىلعى جەلتوقسان وقيعاسىنىڭ تاريحي ماڭىزى، وعان قاتىستى داۋلى ماسەلەلەر مەن ءالى دە تولىق زەرتتەلمەگەن دەرەكتەر جونىندە پىكىر ءبىلدىردى.
زەرتتەۋشىنىڭ ايتۋىنشا، بيىل جەلتوقسان وقيعاسىنا 40 جىل تولىپ وتىر. ول ەڭ الدىمەن جەلتوقساندى «وقيعا» ەمەس، ۇلتتىق سيپاتتاعى كوتەرىلىس رەتىندە باعالاۋ قاجەتتىگىن اتاپ ءوتتى. ونىڭ پىكىرىنشە، جاستاردىڭ الاڭعا شىعۋىنا قازاقستان كومپارتياسى باسشىلىعىنا سىرتتان باسشى تاعايىندالۋى عانا ەمەس، ۇلتتىق مۇددەنىڭ ۇزاق ۋاقىت بويى ەسكەرىلمەۋى دە سەبەپ بولعان.
سۇحبات بارىسىندا بولاتبەك تولەپبەرگەن جەلتوقسان كوتەرىلىسىنىڭ ۇيىمداستىرىلۋى، سول كەزەڭدەگى بيلىكتىڭ ارەكەتى جانە كوتەرىلىسكە قاتىسۋشىلارعا قاتىستى جۇرگىزىلگەن تەرگەۋ جۇمىستارى تۋرالى ايتتى. ونىڭ سوزىنشە، كوتەرىلىستى تەرگەۋگە ارنايى رەسەيدەن ماماندار تارتىلىپ، جاستاردى جازالاۋ ءۇشىن ارنايى جاساقتار قۇرىلعان.
زەرتتەۋشى جەلتوقسان كوتەرىلىسىنىڭ كەڭەس وداعىنىڭ ىدىراۋىنا ىقپال ەتكەن تاريحي وقيعالاردىڭ ءبىرى بولعانىن ايتىپ، سونىمەن قاتار قازاقستاننىڭ تاۋەلسىزدىگىن نەگە وداقتاس رەسپۋبليكالاردىڭ ىشىندە ەڭ سوڭعىلاردىڭ ءبىرى بولىپ جاريالاعانىنا قاتىستى ءوز كوزقاراسىن ءبىلدىردى.
