قازاقستان كاسپي تەڭىزىنىڭ ەكولوگيالىق جاعدايىن باقىلاۋ جۇمىستارىن كۇشەيتۋ ماقساتىندا شامامەن 2,36 ميلليون دوللار ءبولىپ، عىلىمي-زەرتتەۋ جۇمىستارىنا قاجەتتى زاماناۋي جابدىقتار ساتىپ الماق، دەپ حابارلايدى "ادىرنا" ۇلتتىق پورتالى.
ۇكىمەت مالىمەتىنشە، قارجى مەملەكەتتىك رەزەرۆتەن كاسپي تەڭىزىن زەرتتەۋ باعىتىندا جۇمىس ىستەيتىن عىلىمي ۇيىمعا بولىنگەن. جاڭا قۇرالدار تەڭىزدەگى ەكسپەديتسيالار كەزىندە جانە مامانداندىرىلعان گيدروبيولوگيالىق، گيدروحيميالىق زەرتحانالاردا قولدانىلماق. قازىر قازاقستاننىڭ كاسپي بولىگىندە قورشاعان ورتانىڭ جاعدايى بىرنەشە باعىت بويىنشا تۇراقتى باقىلانادى. ماماندار اۋا رايى مەن سۋ دەڭگەيىنەن باستاپ، سۋدىڭ حيميالىق قۇرامىن، بيولوگيالىق كورسەتكىشتەردى جانە تەڭىز تۇبىندەگى شوگىندىلەردى زەرتتەيدى. جالپى مونيتورينگ 50 كورسەتكىشتى قامتيدى. جاعالاۋ اۋماعىندا تاعى 26 پارامەتر بويىنشا باقىلاۋ جۇرگىزىلەدى. زەرتتەۋ جۇمىستارى تەڭىزدەگى ارنايى ستانتسيالاردى دا قامتيدى. بيىل 21 ستانتسيادا ەكى عىلىمي ەكسپەديتسيا وتكىزۋ جوسپارلانعان. بۇعان قوسا، جاعالاۋداعى 22 نۇكتەدە تۇراقتى باقىلاۋ ۇيىمداستىرىلعان.
كاسپيدىڭ ەكولوگيالىق ماسەلەلەرى ءبىر عانا ەلدىڭ اۋماعىمەن شەكتەلمەيتىندىكتەن، قازاقستان باسقا دا كاسپي ماڭى مەملەكەتتەرىمەن بىرلەسكەن جۇمىستاردى جالعاستىرىپ كەلەدى. قازىر تاراپتار تەڭىزدەگى وزگەرىستەرگە بەيىمدەلۋ جانە ونىڭ ەكوجۇيەسىن ساقتاۋ جونىندەگى ورتاق ءىس-قيمىل جوسپارىن تالقىلاۋدا.
جوسپارعا ەلدەر اراسىنداعى عىلىمي اقپارات الماسۋ، زەرتتەۋ ناتيجەلەرىن ۇيلەستىرۋ جانە كاسپيدىڭ تابيعي رەسۋرستارىن قورعاۋعا باعىتتالعان بىرلەسكەن شارالار ەنگىزىلۋى مۇمكىن.
