كينورەجيسسەر، كينودراماتۋرگ، كازاقستاننڭ حالىق ءارتىسى تالعات تەمەنوۆ ەلدەگى ساياسي جايتتارعا باعا بەرىپ، قاڭتار وقيعاسىنا قاتىستى ويىن جەتكىزدى، دەپ جازادى "ادىرنا" ۇلتتىق پورتالى. بۇل تۋرالى ول "ادال ادام" YouTube ارناسىنا بەرگەن سۇحباتىندا ايتتى.
تالعات تەمەنوۆ قاڭتار وقيعاسىن قولدان ىستەلگەن دۇنيە دەپ اتاپ، اقىلعا سىيمايتىن فاشيزم ارەكەتتەرى جاسالدى دەپ سيپاتتادى:
"توقاەۆ حالىققا سەندى، حالىق توقاەۆقا سەندى. توقاەۆتىڭ اتىن جامىلعان قانىشەرلەر پرەزيدەنتتى قارالاپ ادامنىڭ اقىلىنا سىيمايتىن فاشيزمگە دەيىن باردى. بۇل - مەملەكەتتىك توڭكەرىس. ونى ۇيىمداستىرعاندار ولجاس سۇلەيمەنوۆ ايتپاقشى، نازارباەۆتىڭ قاسىنداعى جاندايشاپتارى" دەدى ول.
سونىمەن قاتار ول نازارباەۆتىڭ 30 جىلدىق بيلىگىندەگى ايتىلعان سوزدەرىن سىنادى.
"30 جىل بويى توزاققا تۇستىك. دامىعان 30 ەلدىڭ قاتارىنا كىرەمىز دەگەن سوزدەر، كوشەنىڭ تىلىمەن ايتقاندا قۇلاقتان تەپكەن يدەولوگيا بولدى" دەدى ول.
"ادامنىڭ بولمىسىندا عىلىم مەن ءبىلىم بولماعان جەردە كومەككە ءدىن كەلەدى. رەسمي ەمەس، وزگە ءدىن اعىمدارى كەلەدى. ءبىزدىڭ قازاقتىڭ سورى باسقا اعىمدار ما دەپ قورقامىن" دەدى تالعات مىرزا ءدىن ماسەلەسىندەگى اكتۋالدى دۇنيەلەردى قوزعاي كەتىپ.
