اشحابادتا تۇراتىن تاۋەلسىز جۋرناليست سولتان اچيلوۆا تۇركىمەنستان پرەزيدەنتى سەردار بەردىمۇحامەدوۆ پەن ونىڭ اكەسى، حالىق ءماسليحاتىنىڭ توراعاسى گۋربانگۋلى بەردىمۇحامەدوۆكە ۆيدەو ۇندەۋ جولدادى، دەپ حابارلايدى "ادىرنا" ۇلتتىق پورتالى.
ول ولاردى وتىرىك ايتتى، ەل ەكونوميكاسىن قۇلدىراتتى، ءبىلىم سالاسىنداعى جەمقورلىق، كەدەي حالىقتىڭ ومىرىنە بەي-جاي قارادى دەپ ايىپتادى.
«باياعىنىڭ اقىندارى ايتقانداي، كۇناعا باتقان بايلار ءوز ەلىن قۇرتىپ جاتقان زاماندا ءومىر ءسۇرىپ جاتقانىما قاتتى وكىنەمىن. ەل باسشىلارى، بەردىمۇحامەدوۆتەر! ەلدىڭ تابيعي بايلىعىن ءوز مۇددەلەرىڭىزگە پايدالانىپ، قاجەتسىز قۇرىلىستار سالۋعا اقشا جۇمساپ، ەل ەكونوميكاسىن كۇيرەتىپ جاتىرسىزدار. كەدەي كەدەيلەنەدى، سەنىڭ كىناڭنەن مەزگىلسىز ولەدى. سىزدەر دەنساۋلىقتى قۇرتتىڭىزدار جانە ادامداردىڭ ءومىر ءسۇرۋ ۇزاقتىعى كۇرت قىسقاردى. بازارلارداعى ءونىمنىڭ كوپتىگىن ايتاسىز، بىراق ونىڭ باعاسى حالىقتىڭ باسىم بولىگىنە قولجەتىمسىز. حالىقتىڭ جارتىسى ءتىپتى نانعا دا اقشا تابا الماي، جوقشىلىقتا كۇنەلتىپ ءجۇر. تەلەديداردان حالىقتىڭ تاۋىق ەتىمەن قامتاماسىز ەتىلگەنىن ايتادى. بۇل ەڭ ارزان ەت ءونىمى. بىراق ءىس جۇزىندە ولاي ەمەس. قازىر كۇن سۋىقتا تاۋىق ەتىن نەمەسە جۇمىرتقا ساتىپ الۋ ءۇشىن حالىق كەزەككە تۇرۋدا. بىراق بۇل ونىمدەر يران مەن تۇركيادان دا جەتكىزىلەدى. ەلدى ءتىپتى ءوز ونىمدەرىڭىزبەن دە قامتاماسىز ەتىپ وتىرعان جوقسىز. حالىق قولجەتىمدى باعاداعى نەگىزگى ازىق-تۇلىك ونىمدەرىمەن – ۇن، نان، تاۋىق ەتى، جۇمىرتقامەن قامتاماسىز ەتىلمەگەن" دەپ بارلىق ماسەلەلەردى ءتىزىپ بەردى اچيلوۆا.
سونداي-اق، ول ەلدەگى اۋىز سۋ جەتىسپەۋشىلىگى ماسەلەسىن دە العا تارتىپ، ەلدىڭ جۇتاپ بارا جاتقانىن ايتتى.
"حالىق جۇتاپ بارادى. ال ءسىز بولساڭىز وتىرىك ەسەپتەرگە قۋانىپ ءجۇرسىز. بەرزەنگىدەگى باس جانە مويىن ەمدەۋ ورتالىعىندا توسەك-ورىنداردا ماتراتستار مەن جاستىقتار جوق، ناۋقاستار توسەك-ورىندارىن، ءتىپتى ءدارى-دارمەگىن دە وزىمەن بىرگە الىپ كەلۋى كەرەك. سونىمەن قاتار، ولاردان جوق ازىق-تۇلىك ءۇشىن اقشا سۇراتۋدا" دەپ قوستى ول.
"اكەلى-بالالى بەردىمۇحامەدوۆتەر، حالىقتىڭ ازابى ءۇشىن، ۋاقىت كەلگەندە، سەندەردى ەشتەڭە قۇتقارمايدى. 52 قاجىلىق جاساساڭ دا. حالىققا جاساعان قياناتتارىڭ ءۇشىن جاۋاپ بەرۋگە تۋرا كەلەدى. مۇنى ەستە ساقتاڭىز. ءسىزدى مەككەگە قاجىلىققا بارۋ جانە قاراپايىم حالىقتىڭ قالتاسىنان الاتىن اقشالارىڭىز (ساداقالارىڭىز) قورعامايدى. ءسىز قامقورلىققا مۇقتاج بالالارعا كومەك كورسەتۋ قورىن قۇردىڭىز. بىراق ونى تولىقتىرۋ ءۇشىن حالىقتان اقشا الىپ جاتسىز. تابيعي رەسۋرستارعا باي ەلدە شىنىمەن مۇقتاج ادامدار بولۋى مۇمكىن بە؟ قامقورلىققا مۇقتاج بالالار بار ما؟ ءسىز ءوز ارەكەتتەرىڭىزدەن ۇيالمايسىز با؟» دەدى ايەل پرەزيدەنتكە.
تولىعىراق ۆيدەودا:
