الماتىدا «اتىڭ شىقپاسا, پودكاست جاسا: پايدالى پودكاست جاساۋ شەبەرحاناسى» كىتابىنىڭ تۇساۋكەسەرى ءوتتى. بۇل كىتاپ تاجىريبەلى پودكاستەرلەر باقىتگۇل سالىحوۆا مەن اينەل ءامىرحان قالىڭ كوپشىلىككە Alqa Publishing باسپا ۇيىمەن بىرلەستىكتە شىعارعان پودكاست سالاسى تۋرالى قازاق تىلىندەگى العاشقى ەڭبەگى، دەپ حابارلايدى "ادىرنا" پورتالى kazgazeta.kz-كە سىلتەپ.
«پودكاست دۇنيە جۇزىندە قارقىندى دامىپ كەلە جاتقان سالالاردىڭ ءبىرى. قازاقستان دا بۇل كوشتەن قالىپ جاتقان جوق. اسىرەسە، سوڭعى بىرنەشە جىل پودكاستەرلەردىڭ قاتارى ارتىپ كەلەدى. بىراق ءوزىم پودكاست سالاسىنا 2019 جىلى كەلگەندە اقپاراتتى تىرنەكتەپ جيناۋعا تۋرا كەلگەنى ەسىمدە. كىتاپتار دا تەك اعىلشىن، ورىس تىلدەرىندە بولاتىن. وسى ولقىلىقتىڭ ورنىن تولتىرۋ ماقساتىندا، ءارى سالاعا كەلىپ جاتقان ماماندارعا، قىزىعۋشىلىق تانىتقان ادامدارعا پايدالى بولسىن دەگەن نيەتپەن باقىتگۇل ەكەۋىمىزدە وسى كىتاپتى جازۋ يدەياسى تۋىندادى»، - دەيدى اينەل ءامىرحان، كىتاپ اۆتورلارىنىڭ ءبىرى، OY-DETOX پودكاستىنىڭ جۇرگىزۋشىسى.
«كىتاپ جازۋ بارىسىندا «پودكاست» سوزىمەن پودكاست ەمەس نارسەلەردى اتاۋ پروبلەماسىنا كەزىكتىك. سۇحبات، اڭگىمە فورماتىنداعى كوپتەگەن YouTube جوبالاردى پودكاست دەپ اتاۋ سانگە اينالدى، بىراق ولار ارنايى پودكاست پلاتفورمالارىندا اۋديو فورماتىندا جاريالانباعاندىقتان، پودكاست بولا المايدى. جاڭا سوزدەرگە، تەرميندەرگە مۇقيات بولىپ، ماعىناسىن ءتۇسىنىپ، ءوزىن دە وزگەلەردى دە شاتىستىرماۋ ماڭىزدى. وسى رەتتە، كىتابىمىز پودكاست باستاپ كەتۋىڭىزگە كومەك بەرىپ قانا قويماي، اعارتۋشىلىق قىزمەت تە اتقارادى»، - دەپ جالعايدى كىتاپ سواۆتورى باقىتگۇل سالىحوۆا.
كىتاپتا قازاقستانداعى پودكاست سالاسىنىڭ دامۋى، پودكاست تاقىرىپتارى مەن فورماتتارى، تىڭداۋشىلار قىزىعۋشىلىعى، سالانىڭ بولاشاعى سىندى سۇراقتار قامتىلعان. اشىق اقپارات كوزدەرىندەگى پودكاستارعا تالداۋ جاسالىپ، ەلىمىزدەگى پودكاستاردىڭ كلاسسيفيكاتسياسى ۇسىنىلعان.
«جىلدان جىلعا قازاق تىلىندە شىعاتىن كىتاپتاردىڭ سانى ارتىپ كەلەدى. شەتەل ادەبيەتى، شەتەل وقۋلىقتارىن قازاق تىلىنە اۋدارۋ ءبىر ىزگە قويىلدى. بىراق بىزگە وتاندىق كونتەكستكە، قانداي دا ءبىر سالا تۋرالى زەرتتەۋگە نەگىزدەلگەن جەرگىلىكتى اۆتورلاردىڭ جۇمىستارىنا نازار سالۋ كەرەك. القا باسپاسى ايەل زەرتتەۋشى، جازۋشىلارعا باسىمدىق بەرەتىندىكتەن وسى كىتاپقا قۋانا باسىپ شىعاردىق»، - دەيدى Alqa باسپاسىنىڭ باس رەداكتورى بايان حاسانوۆا.
كىتاپ ساتىلىمعا شىقتى، ونى Alqa Publishing باسپا ۇيىنەن جانە مەلومان دۇكەندەرىنەن تابا الاسىزدار.
