Almatyda «Atyń shyqpasa, podkast jasa: paıdaly podkast jasaý sheberhanasy» kitabynyń tusaýkeseri ótti. Bul kitap tájirıbeli podkasterler Baqytgúl Salyhova men Áınel Ámirhan qalyń kópshilikke Alqa Publishing baspa úıimen birlestikte shyǵarǵan podkast salasy týraly qazaq tilindegi alǵashqy eńbegi, dep habarlaıdy "Adyrna" portaly kazgazeta.kz-ke siltep.
«Podkast dúnıe júzinde qarqyndy damyp kele jatqan salalardyń biri. Qazaqstan da bul kóshten qalyp jatqan joq. Ásirese, sońǵy birneshe jyl podkasterlerdiń qatary artyp keledi. Biraq ózim podkast salasyna 2019 jyly kelgende aqparatty tirnektep jınaýǵa týra kelgeni esimde. Kitaptar da tek aǵylshyn, orys tilderinde bolatyn. Osy olqylyqtyń ornyn toltyrý maqsatynda, ári salaǵa kelip jatqan mamandarǵa, qyzyǵýshylyq tanytqan adamdarǵa paıdaly bolsyn degen nıetpen Baqytgúl ekeýimizde osy kitapty jazý ıdeıasy týyndady», - deıdi Áınel Ámirhan, kitap avtorlarynyń biri, OY-DETOX podkastynyń júrgizýshisi.
«Kitap jazý barysynda «podkast» sózimen podkast emes nárselerdi ataý problemasyna keziktik. Suhbat, áńgime formatyndaǵy kóptegen YouTube jobalardy podkast dep ataý sánge aınaldy, biraq olar arnaıy podkast platformalarynda aýdıo formatynda jarııalanbaǵandyqtan, podkast bola almaıdy. Jańa sózderge, termınderge muqııat bolyp, maǵynasyn túsinip, ózin de ózgelerdi de shatystyrmaý mańyzdy. Osy rette, kitabymyz podkast bastap ketýińizge kómek berip qana qoımaı, aǵartýshylyq qyzmet te atqarady», - dep jalǵaıdy kitap soavtory Baqytgúl Salyhova.
Kitapta Qazaqstandaǵy podkast salasynyń damýy, podkast taqyryptary men formattary, tyńdaýshylar qyzyǵýshylyǵy, salanyń bolashaǵy syndy suraqtar qamtylǵan. Ashyq aqparat kózderindegi podkastarǵa taldaý jasalyp, elimizdegi podkastardyń klassıfıkaııasy usynylǵan.
«Jyldan jylǵa qazaq tilinde shyǵatyn kitaptardyń sany artyp keledi. Shetel ádebıeti, shetel oqýlyqtaryn qazaq tiline aýdarý bir izge qoıyldy. Biraq bizge otandyq kontekstke, qandaı da bir sala týraly zertteýge negizdelgen jergilikti avtorlardyń jumystaryna nazar salý kerek. Alqa baspasy áıel zertteýshi, jazýshylarǵa basymdyq beretindikten osy kitapqa qýana basyp shyǵardyq», - deıdi Alqa baspasynyń bas redaktory Baıan Hasanova.
Kitap satylymǵa shyqty, ony Alqa Publishing baspa úıinen jáne Meloman dúkenderinen taba alasyzdar.
