يراندا «بالا كەلىن» اتانعان 29 جاستاعى ساميرا سابزيان دارعا اسىلدى. ول 10 جىل بۇرىن ءولىم جازاسىنا كەسىلگەن. بۇل تۋرالى The Times باسىلىمى Iran Human Rights قۇقىق قورعاۋ ۇيىمىنا سىلتەمە جاساپ جاريالادى، دەپ حابارلايدى “ادىرنا” ۇلتتىق پورتالى.
2009 جىلى 15 جاسار ساميرا جاسى ۇلكەن ادامعا تۇرمىسقا شىعۋعا ءماجبۇر بولىپ، تۋىستارىنىڭ ايتۋىنشا، كەيىننەن جۇيەلى تۇردە تۇرمىستىق زورلىق-زومبىلىققا تاپ بولعان. 19 جاسىندا وعان كۇيەۋىن ءولتىردى دەگەن ايىپ تاعىلدى. سوت ءولىم جازاسىن تاعايىندادى، بىراق ونىڭ ورىندالۋى بيۋروكراتيالىق سەبەپتەرگە بايلانىستى جۇيەلى تۇردە كەيىنگە قالدىرىلدى. بويجەتكەن قاتاڭ رەجيمدەگى تۇرمەگە جىبەرىلىپ، 10 جىل بويى ءولىم جازاسىن كۇتۋمەن بولدى.
تۇتقىنعا الىنعان كەزدە ساميرا سابزياننىڭ ەكى بالاسى جانە ىشىندە ءسابيى بولدى. وعان بالالارىمەن ون جىلدان كەيىن تەك ءبىر رەت – جەلتوقسان ايىنىڭ باسىندا، ءولىم جازاسىنا كەسىلگەنگە دەيىن كەزدەسۋگە رۇقسات بەرىلدى.
ايتا كەتەيىك، يراندا قىزداردىڭ زاڭدى نەكەگە تۇرۋ جاسى 13 جاس، بىراق اكەسىنىڭ نەمەسە اتاسىنىڭ كەلىسىمىمەن ولار ودان دا ەرتە تۇرمىسقا شىعا الادى.
قۇقىق قورعاۋشىلاردىڭ ايتۋىنشا، يران ايەلدەردى ءولىم جازاسىنا كەسۋ بويىنشا الەمدىك رەكوردقا يە. ولاردىڭ مالىمەتىنشە، ساميرا سابزيان 2023 جىلدىڭ باسىنان بەرى دارعا اسىلعان ون جەتىنشى ايەل بولدى.
