بۇگىن — قازاقتان شىققان العاشقى عىلىم كانديداتى، الاش قايراتكەرى، الاشوردا ۇكىمەتىنىڭ مۇشەسى، 1-2 مەملەكەتتىك دۋمالاردىڭ دەپۋتاتى باقتىگەرەي قۇلمانوۆتىڭ تۋعان كۇنى، دەپ حابارلايدى «ادىرنا» ءتىلشىسى.
كورنەكتى تۇلعا 1859 جىلدىڭ 22 جەلتوقسانىندا قازىرگى اتىراۋ وبلىسىنىڭ قۇرمانعازى اۋدانىندا دۇنيەگە كەلگەن. 1872 – 1881 جىلدارى ورىنبورداعى ەر بالالار گيمنازياسىندا وقىپ، ونى كۇمىس مەدالمەن تامامداعان.
1881 جىلى سانكت-پەتەربۋرگ ۋنيۆەرسيتەتىنىڭ زاڭ فاكۋلتەتىنە وقۋعا تۇسكەن. بۇل فاكۋلتەتتە 1883 جىلدىڭ جەلتوقسانىنا دەيىن 1-كۋرستا قاتارىنان 3 جىل وقيدى. ءبىر تاڭعالارلىعى، قۇلمانوۆ 1-ءشى كۋرسقا ءوز وتىنىشىمەن قالا بەرگەن. ءۇشىنشى جىلى تاعى قالۋعا ۋنيۆەرسيتەت باسشىلىعى رۇقسات بەرمەگەندىكتەن، ول 1884 جىلدىڭ قاڭتارىنان باستاپ ۋنيۆەرسيتەتتىڭ شىعىس تىلدەرى فاكۋلتەتىنە اۋىسادى دا، 1889 جىلى 9 ناۋرىزدا №877 ديپلوم الىپ شىعادى.
اراب، پارسى، وسمان، تاتار تىلدەرى جانە ورىس سوزدىگىنەن وتە جاقسى باعا الىپ، ۋنيۆەرسيتەت كەڭەسىنىڭ 1888 جىلعى 17 قىركۇيەكتەگى ۇيعارىمىمەن عىلىم كانديداتى دارەجەسىنە لايىق دەپ باعالانادى.
باقتىگەرەي قۇلمانوۆ 1906-1907 جىلدارى ءى مەملەكەتتىك جانە ءىى مەملەكەتتىك دۋمالارعا ىشكى وردا قازاقتارىنان دەپۋتات بولىپ سايلانىپ، مۇسىلمان فراكتسياسىن باسقارعان. 1917 جىلعى ءساۋىردىڭ 23-نەن جەلتوقساننىڭ 2-نە دەيىن بوكەي ورداسىنداعى ۋاقىتشا ۇكىمەتتىڭ كوميسسارى بولدى.
ال 1917 جىلى 5-13 جەلتوقساندا وتكەن جالپىقازاقتىق سەزگە ول ارنايى شاقىرىلىپ، سەز پرەزيدۋمىنىڭ توراعاسى بولدى. سەزدە الاشوردا ۇكىمەتىنىڭ مۇشەلىگىنە سايلاندى. الاشوردا ۇكىمەتىنىڭ توراعاسىنىڭ ورنىنا ءاليحان بوكەيحانوۆ، ا.تۇرلىباەۆ پەن بىرگە ب.قۇلمانوۆتىڭ دا ءتۇسۋى دە كوپ جايتتى اڭعارتادى.
وسى سەزدەن كەيىن ول ەلىنە قايتىپ، ارتىنان سۇزەك اۋرۋىنان 1919 جىلى جاڭاقالادا قايتىس بولدى.
