بالا قۇقىقتارى جونىندەگى ۋاكىل دينارا زاكيەۆا جەتىم بالالارعا بولىنەتىن الەۋمەتتىك تۇرعىن ءۇيدىڭ قيىندىقتارىن ايتتى، دەپ حابارلايدى "ادىرنا" ءتىلشىسى.
ۋاكىل الەۋمەتتىك تۇرعىن ۇيلەردى ءبولۋ كەزىندە جەتىم بالالارعا ارنالعان كۆوتانى ساقتالماۋى ۇلكەن ماسەلە ەكەنىن ايتتى.
"قازىرگى ۋاقىتتا تۇرعىن ۇيگە كەزەكتە 645 مىڭعا جۋىق ازامات تۇر، ولاردىڭ ىشىندە 62,6 مىڭ جەتىم بالالار. قازىرگى ۋاقىتتا جەتىم بالالارعا جانە اتا-انا قامقورلىعىنسىز قالعان بالالارعا تۇرعىن ءۇي بەرۋدىڭ نەگىزگى پروبلەماسى-الەۋمەتتىك تۇرعىن ءۇي قۇرىلىسىنىڭ قارقىنى. ەكىنشى ماسەلە كەيبىر وبلىستاردا اكىمدىكتەردىڭ كۆوتانى (20 %) ساقتاماۋى", - دەدى زاكيەۆا.
سونىمەن قاتار، شەنەۋنىك اكىمدىك باسشىلىعىن الەۋمەتتىك تۇرعىن ءۇيدى ءبولۋ كەزىندە كۆوتالاردى ساقتاماعانى ءۇشىن جازالاۋدى دا ۇسىندى. ول ءسوز سوڭىندا تۇرعىن ءۇي ءبولۋ ماسەلەسى بار ەكەنىنە وكىنىش ءبىلدىردى.
"مەن 18 جاسقا تولعان جەتىم بالالار بىردەن ءوز ءۇيىنىڭ كىلتتەرىن العانىن قالايمىن. ول ءۇشىن جەتىم بالالارعا ارنالعان تۇرعىن ءۇي ساتىپ الۋدىڭ جاڭا جۇيەسى مەن تەتىگىن قاراستىرۋ قاجەت، مۇمكىن "ۇلتتىق قور — بالالارعا" باعدارلاماسى شەڭبەرىندە جەتىم بالالارعا ارنالعان ەسەپتەۋلەر كەزىندە جوعارى كوەففيتسيەنتتى ەنگىزۋدى قاراستىرۋ قاجەت", — دەپ تۇيىندەدى ول.
زاكيەۆا مەملەكەت باسشىسى ماۋسىم ايىندا جەتىم بالالار مەن اتا-اناسىنىڭ قامقورلىعىنسىز قالعان بالالارعا ارنالعان تۇرعىن ءۇي ماسەلەلەرىن شەشۋ مىندەتىن قويعانىن اتاپ ءوتتى.
