كوكشەتاۋدا جاڭا جىل مەرەكەسىن تويلاۋ ءۇشىن 45 ملن تەڭگە بولىنبەك، دەپ حابارلايدى "ادىرنا" ءتىلشىسى قازاقپاراتقا سىلتەپ.
قالا اكىمدىگى ءباسپاسوز قىزمەتىنىڭ مالىمەتىنشە، جاڭا جىل مەرەكەسىنە وراي قالانى بەزەندىرۋ ءۇشىن 45 ملن تەڭگەگە مەملەكەتتىك ساتىپ الۋ شارتى جاسالعان.
«كوكشە تازالىق» جشس مەردىگەر ۇيىمىنىڭ شارتىنا سايكەس وبلىس ورتالىعىنداعى ابىلاي حان الاڭىندا مۇز قالاشىعى سالىنباق. ونىڭ بيىكتىگى – 22 مەتر. جاڭا جىلدىڭ باستى شىرشاسى ورناتىلىپ، ءتۇرلى ءتۇستى جارىقديوتتى شامدارمەن جانە اشەكەي بۇيىمدارمەن بەزەندىرىلەدى. قازىرگى كەزدە شىرشا قۇراستىرىلىپ جاتىر.
ابىلاي حان الاڭىندا، «دوستار» مادەنيەت ءۇيى مەن «بولاشاق سارايىنا» الدىندا ءبىر ۇلكەن، ءبىر كىشىرەك سىرعانايتىن مۇز توبەشىك ورناتىلادى. سونداي-اق، وبلىستىق فيلارمونيانىڭ جانىندا، زاستانتسيوننىي، ۆاسيلكوۆسكي، سارىارقا، تسەنترالنىي، قۇلاگەر، بەيبىتشىلىك، جايلاۋ شاعىناۋداندارىندا، ابىلاي حان داڭعىلى مەن شۇعىلا كوشەسىندە ءبىر شىرشادان ورناتىلماق.
«مۇز قالاشىعىن پايدالانۋ كەزىندە ونى كۇتىپ ۇستاۋ، كەيىن بولعان سوڭ بولشەكتەپ جيناستىرۋ كوزدەلگەن. مەرەكەلىك ءىس - شارالارعا ارنالعان شىعىستاردى قىسقارتۋ ماقساتىندا بۇرىن بەلگىلەنگەن جانە جارامدى كۇيدە تۇرعان بەزەندىرۋ ەلەمەنتتەرىن قايتا ساتىپ الۋ جۇرگىزىلمەيدى»، - دەپ قالا اكىمدىگىنىڭ ءباسپاسوز قىزمەتىنەن.
