الماتىدا «River Park» تۇرعىن ءۇي كەشەنىنىڭ تۇرعىندارى جاۋاپكەرشىلىككە تارتىلدى، "ادىرنا" ءتىلشىسى.
پوليتسيا تۇرعىن ءۇي كەشەنىن جىلۋمەن قامتاماسىز ەتۋدى تالاپ ەتىپ، جولدى جاۋىپ تاستاعان «River Park» تۇرعىن ءۇي كەشەنىنىڭ تۇرعىندارىن جاۋاپكەرشىلىككە تارتتى.
23 جەلتوقسان قارساڭىندا الماتىداعى «River Park» تۇرعىن ءۇي كەشەنىنىڭ ونداعان تۇرعىنى ماقاتاەۆ كوشەسىن جاۋىپ، ۇيلەرىن قالىپتى جىلىتۋمەن قامتاماسىز ەتۋدى تالاپ ەتكەن.
بۇعان دەيىن تۇرعىندار قالا قۇرىلىسىن باسقارۋ باسقارماسىنا ۇندەۋ جاساعان. نارازىلىقتان كەيىن باسقارما قۇرىلىس كومپانياسىن سوتقا بەرگەن.
«ءبىزدىڭ ۇيلەرىمىز گازبەن جىلىتىلادى دەپ جوسپارلانعان، بىراق ازىرگە گاز قوسىلعان جوق. ەگەر قازىر ەلەكتر قۇرىلعىلارىن قوسا باستاساق، وندا ەلەكتر جەلىسىنە سالماق تۇسەدى»، – دەدى تۇرعىندار.
پوليتسيا بۇل جولى جولدى جاپقان تۇرعىنداردى قوعامدىق ءتارتىپتى بۇزدى دەپ جاۋاپكەرشىلىككە تارتقان.
«الماتىدا «River Park» تۇرعىن ءۇي كەشەنىنىڭ تۇرعىندارى جىلۋدى قوسۋ تالاپتارىمەن ماقاتاەۆ كوشەسىن جاۋىپ تاستادى. وسىلايشا بۇل ازاماتتار قوعامدىق ءتارتىپتى بۇزىپ، باسقا ازاماتتارعا قولايسىزدىق تۋعىزدى. وسىعان بايلانىستى ءتورت ازاماتقا قاتىستى پوليتسيا قىزمەتكەرىنىڭ زاڭدى تالابىنا باعىنباعانى ءۇشىن اكىمشىلىك قۇقىق بۇزۋشىلىق تۋرالى كودەكستىڭ 667-بابى بويىنشا اكىمشىلىك حاتتامالار تولتىرىلدى. اكتسيانىڭ باسقا توعىز قاتىسۋشىسى كولىك قۇرالدارىنىڭ جۇرىسىنە كەدەرگى جاساعانى ءۇشىن كودەكستىڭ 614-بابى بويىنشا اكىمشىلىك جاۋاپكەرشىلىككە تارتىلدى. ەستەرىڭىزگە سالا كەتەيىك، زاڭسىز نارازىلىق اكتسيالارىن ۇيىمداستىرۋ جانە وتكىزۋ اكىمشىلىك جانە قىلمىستىق جاۋاپكەرشىلىككە اكەپ سوعادى»، – دەدى قر ءىىم اپك توراعاسى قايسار سۇلتانباەۆ.
