ءماجىلىس دەپۋتاتى داۋلەت مۇقاەۆ سپورتقا بولىنگەن قارجىنىڭ قايدا كەتىپ جاتقانى جايلى سۇرادى. بۇل تۋرالى ول ماجىلىستەگى دوڭگەلەك ۇستەل بارىسىندا ايتتى، دەپ حابارلايدى “ادىرنا” ۇلتتىق پورتالى.
«بۇقارالىق سپورتقا قانشا قارجى بولىنەتىنىن مينيسترلىكتەن دە سۇراتتىم جانە ءار وبلىسقا حات جىبەرىپ، مالىمەت جيناعان ەدىم. سىزدەردىڭ ەسەپتەرىڭىزدەگى بولىنگەن قارجى 289 ملرد (تەڭگە) سولاي كەلدى دە، بىراق وبلىستاردىڭ بەرگەن ەسەپتەرى تۇسىنىكسىز. ەشكىم ەشتەڭە تۇسىنبەيدى. «ءسىز قاي سپورتتى سۇراپ جاتىرسىز؟ قاي اقشانى؟» دەپ وزدەرى مەنەن سۇرايدى. 20 وبلىس، سونىڭ ىشىندە استانا، الماتى جانە شىمكەنت قالالارىن قوسقان كەزدە، سولتۇستىك قازاقستان مەن پاۆلودار وبلىستارى عانا اقشانىڭ قايدا كەتكەنىن، قايدا بولىنگەنىن، قايدا سپورتقا بولىنگەنىن، ءبارىن ءتۇسىنىپ وتىرعان سياقتى. ولار بارلىعىن ناقتى قايدا كەتكەنىن ءبولىپ، جارىپ، مالىمەت بەردى»، - دەدى دەپۋتات.
دەپۋتاتتىڭ ايتۋىنشا، قالعان ايماقتار بولىنگەن قارجى تۋرالى جالپى اقپارات عانا بەرگەن. مىسالى، استانا بويىنشا 20 ملرد (تەڭگە), قوستاناي وبلىسىنا 13 ملرد (تەڭگە).
«جالپى بولىنگەن اقشا تۋرالى مينيسترلىك تۇگىلى، جەرگىلىكتى باسشىلاردىڭ وزدەرى تۇسىنبەي جاتىر»، - دەيدى مۇقاەۆ.
