بۇگىن - قازاق ايەلدەرىنىڭ تەڭدىگى ءۇشىن كۇرەسكەن تۇلعا الما ورازباەۆانىڭ تۋعان كۇنى، دەپ حابارلايدى “ادىرنا” ۇلتتىق پورتالى.
باتىس قازاقستان وبلىسىنىڭ جانىبەك اۋدانىندا تۋعان. ورداداعى ورىس-قازاق ايەلدەر ۋچيليشەسىن، 2 سىنىپتىق قىزدار مەكتەبىن، پەداگوگيكالىق كۋرستى بىتىرگەن. 1919 جىلى كومسومول قاتارىنا ءوتىپ، سول جىلدىڭ ماۋسىمىندا قىزىل اسكەردىڭ قازاقستانداعى تۇڭعىش ساياسي كلۋبىن ۇيىمداستىردى. سول جىلى قاراشا ايىندا كيروۆ رەۆوليۋتسيالىق كوميتەتى اقپاراتتىق ءبولىمىنىڭ مەڭگەرۋشىسى بولىپ تاعايىندالدى. 1920 جىلى تامىزدا ورىنبور گۋبەرنياسى پارتيا كوميتەتىنىڭ جانىنان قۇرىلعان قىرعىز (قازاق) ءبولىمىنىڭ القا مۇشەلىگىنە سايلاندى. 1920 جىلى قازاندا بۇكىلوداقتىق قۇرىلتاي سەزىنە دەلەگات بولىپ سايلانىپ، ونىڭ اتقارۋ كوميتەتىنىڭ قۇرامىنا ەندى. بوكەي ۇيىمىنان بۇكىلرەسەيلىك شىعىس ايەلدەرىنىڭ سەزىن وتكىزۋگە ات سالىسىپ، ايەل تەڭدىگى، وقۋ-اعارتۋ ماسەلەلەرىن شەشۋگە، ولاردى قوعامدىق جۇمىسقا تارتۋ ىسىنە تىكەلەي ارالاستى.
1921 جىلى مامىردا وتكەن بۇكىلوداقتىق كوممۋنيستىك (بولشەۆيكتەر) پارتياسى بۇكىلوداقتىق جۇمىسشى ايەلدەردىڭ ورتالىق ۇيىمى ماجىلىسىنە قاتىسىپ، ايەلدەر قوزعالىسىنىڭ اتىنان ءسوز سويلەدى. كوممۋنيست ايەلدەردىڭ بەرليندە وتكەن 3-ءشى حالىقارالىق كونفەرەنتسياسىنا، كومينتەرننىڭ 5-ءشى كونگرەسىنە دەلەگات بولىپ قاتىستى. 1931 جىلى اۋىر دەرتكە شالدىعۋىنا بايلانىستى زەينەتكە شىقتى.
ول «ستەپنايا پراۆدا»، «سوۆەتسكايا ستەپ»، «ەڭبەكشى قازاق»، «جاس قازاق»، «دۇرىستىق جولى» گازەتتەرىنە قازاق ايەلدەرىنىڭ قوعام ىسىنە ارالاسۋى، ايەلدەر اراسىنداعى مادەني-اعارتۋ جۇمىستارىنىڭ جۇرگىزىلۋ بارىسى، قالىڭمال ماسەلەلەرىنە ارناپ «قازاق ايەلدەرى داڭعىل جول ۇستىندە»، «قازاق ايەلدەرىنىڭ قالىڭمالدان قۇتىلعان كۇنى»، «وكتيابر رەۆوليۋتسياسى جانە قىرعىز ايەلى»، «ايەلدەر بوستاندىعى» تاعى باسقا ماقالالارىن جاريالاعان. كەيبىر ماقالالارى «قازاق ايەلى»، «ساعيدا» سياقتى بۇركەنشەك اتپەن جازىلعان.
ورازباەۆا قازاق اندەرى مەن كۇيلەرىن جيناعان ا.ۆ.زاتاەۆيچكە ءوزىنىڭ ورىنداۋىمەن قازاقتىڭ «جايىق»، «قوساي»، «تانىسۋ جىرى»، «زەينەشىم»، «سارىجان»، «ءتورت ءپىشىن»، «اينامكوز»، «ياپىراي»، «قىز ۇزاتۋ» (قوشتاسۋ) سياقتى بارلىعى 18 ءانىنىڭ «قازاق حالقىنىڭ 1000 ءانى» جيناعىنا ەنۋىنە مۇرىندىق بولدى.
