1 جەلتوقساندا اتىراۋ - ورال تاس جولىنىڭ 29-شاقىرىمىندا جول-كولىك وقيعاسى بولدى، دەپ حابارلايدى «ادىرنا» ءتىلشىسى.
وبلىستىق پوليتسيا دەپارتامەنتىنىڭ مالىمەتىنشە، Lada Priora اۆتوكولىگىنىڭ جۇرگىزۋشىسى جولعا شىققان جىلقىنى قاعىپ، ارتىنشا قارسى باعىتتا كەلە جاتقان MAN TGX جۇك كولىگىمەن سوقتىعىسقان.
«وقيعا سالدارىنان 1987 جىلى تۋعان جۇرگىزۋشى مەن 1990 جىلى تۋعان جولاۋشى وقيعا ورنىندا قازا تاپتى. تاعى ەكى جولاۋشى ءتۇرلى جاراقاتتارمەن اۋرۋحاناعا جەتكىزىلدى. قازىرگى ۋاقىتتا قاجەتتى ماتەريالدار جينالىپ جاتىر»،- دەلىنگەن حابارلامادا.
بۇدان الدىن «پاۆلودار-قىزىلوردا» اۆتوجولىندا تويوتا ماركالى كولىك جول ۇستىندە تۇرعان جىلقىعا سوعىلىپ، سوندا دا ەكى جولاۋشى قازا تاپقان ەدى.
تۇنگى جولدا جىلقى كورسەڭىز، نە ىستەۋ كەرەك؟
ءتارتىپ ساقشىلارى مۇنداي وقيعالاردىڭ الدىن الۋ ءۇشىن جول قوزعالىسىنا قاتىسۋشىلارعا جىلدامدىق رەجيمىن ساقتاۋ، كولىك قۇرالىنىڭ تەحنيكالىق جاعدايىن ۇنەمى باقىلاۋ ماڭىزدى ەكەنىن ەسكە سالادى. تاجىريبەلى جۇرگىزۋشىلەر مۇنداي جاعدايلاردا كولىك شامىنىڭ جارىعىن ازايتىپ، جانۋاردى ۇركىتپەۋگە تىرىسادى. الايدا مۇنداي ارەكەتتىڭ سالدارىن بىلمەيتىن كەي جۇرگىزۋشىلەر، كەرىسىنشە، جارىقتى ءوشىرىپ-جانىپ نەمەسە كۇشەيتىپ، جانۋاردى ودان ءارى ۇركىتىپ جىبەرەدى. كوزى جارىققا شاعىلىسقان جىلقى باعىتىنان جاڭىلىپ، جارىققا قاراي ۇمتىلىپ، سوقتىعىسۋى مۇمكىن.
مۇنداي جاعدايلاردىڭ الدىن الۋ ءۇشىن جول-پاترۋلدىك پوليتسيا قىزمەتكەرلەرى جۇرگىزۋشىلەرگە جانۋارلارمەن جولدا كەزدەسكەن كەزدەگى قاۋىپسىز ارەكەت الگوريتمدەرىن ءتۇسىندىرۋى جانە ۇنەمى ەسكەرتۋ جۇمىستارىن جۇرگىزۋى ماڭىزدى.
