پاۆلودار وبلىسىندا تاس جولدا بولعان جول اپاتىنان 4 ادام قازا تاپتى

پاۆلودار وبلىسىندا اۋا رايىنىڭ قولايسىزدىعىنان بولعان اپاتتان ءتورت ادام قازا تاپتى، دەپ حابارلايدى «ادىرنا» ۇلتتىق پورتالى.

قايعىلى وقيعا پاۆلودار وبلىسى تەرەڭكول اۋىلىنان 25 شاقىرىم جەردە بولدى. Instagram جەلىسىندە جاريالانعان ۆيدەودا ەكى كولىكتىڭ بەتپە-بەت سوقتىعىسقانى كورسەتىلگەن. «29 جەلتوقسان كۇنى ساعات 17:58-دە جەدەل جاردەم بولىمىنە قوڭىراۋ ءتۇستى. تاس جولدا ەكى كولىك سوقتىعىستى. وقيعا ورنىنا دەرەۋ بايعۇس اۋىلىنىڭ مەديتسينالىق قىزمەتكەرلەرى مەن جەدەل جاردەم بريگاداسى شىقتى»، - دەپ حابارلادى پاۆلودار وبلىسىنىڭ دەنساۋلىق ساقتاۋ باسقارماسىنان. ۆەدومستۆونىڭ حابارلاۋىنشا، 11 مينۋتتان كەيىن دارىگەرلەر وقيعا ورنىندا بولعان. الايدا زارداپ شەككەندەردىڭ بارلىعى قايتىس بولدى. «شامامەن 20-30, 40 جانە 40-45 جاستاعى ازيالىق كەلبەتى بار ءتورت ەر ادامنىڭ ءولىمى راستالدى»، - دەپ حابارلادى ۆەدومستۆودان. كۋاگەرلەردىڭ ايتۋىنشا، جول اپاتى كەزىندە تاس جولدا قاتتى جەل سوققان. ايتا كەتەيىك، 29 جەلتوقساندا قارلى بوران مەن كوكتايعاق سالدارىنان رەسپۋبليكالىق ماڭىزى بار استانا – ەرەيمەنتاۋ – شىدەرتى، قىزىلوردا – پاۆلودار، سونداي-اق شىدەرتى – قاراعاندى ​​باعىتىنداعى بىرنەشە ۋچاسكەدە كولىك قوزعالىسى جابىلدى. «قازگيدرومەت» رمك پاۆلودار وبلىستىق فيليالىنىڭ مالىمەتىنشە، 30 جەلتوقساندا پاۆلودار وبلىسىنىڭ سولتۇستىگى مەن شىعىسىندا قارلى بوران سوعادى. وڭتۇستىك-باتىستان سوعاتىن جەل سەكۋندىنا 15-20 مەتر. جۇرگىزۋشىلەر مۇمكىندىگىنشە ەلدى مەكەندەردەن تىس جەرلەرگە شىقپاۋىن سۇرايدى.

«ادىرنا» ۇلتتىق پورتالى