الماتى وبلىسىنىڭ ءتۋريزمىن دامىتۋعا 58 ميلليارد تەڭگە بولىنەدى

الماتى وبلىسىنىڭ ءتۋريزمىن دامىتۋعا 58 ملرد تەڭگە بولىنەدى، دەپ حابارلايدى "ادىرنا" ۇلتتىق پورتالى وبلىستىق اكىمدىكتىڭ ءباسپاسوز قىزمەتىنە سىلتەمە جاساپ.

ۆەدومستۆونىڭ مالىمەتىنشە، الماتى وبلىسىنىڭ اكىمدىگى مەن ينۆەستورلار توبى اراسىندا "Oi-Qaragai" كۋرورتىن دامىتۋ بويىنشا قاجەتتى جاعدايلار جاساۋعا جانە جوبانى قولداۋعا قاتىستى مەموراندۋمعا قول قويۋ ءراسىمى ءوتتى. "قول جەتكىزىلگەن كەلىسىمدەر شەڭبەرىندە 2028 جىلعا دەيىن تاۋ كۋرورتىن كەڭەيتۋ، اتاپ ايتقاندا اسپالى جولدار سالۋ، تاۋ شاڭعىسى تراسسالارىنىڭ ۇزىندىعىن ۇلعايتۋ، بەتكەيلەردى جابدىقتاۋ، پاراپلانەرلەرگە ارنالعان الاڭدار، گلامپينگتەر، مەيرامحانالار، كولدەر جانە قوناقتارعا ارنالعان ەتنو-قالاشىق جوسپارلانۋدا. جوبانى جۇزەگە اسىرۋ بارىسىندا ءۇش نەگىزگى باعىت بويىنشا مەملەكەتتىك قولداۋ شارالارى ايقىندالدى", - دەدى الماتى وبلىسى اكىمىنىڭ ورىنباسارى رۋستام يساتاەۆ. ونىڭ ايتۋىنشا، ايماق باسشىلىعى ينجەنەرلىك جانە كولىك ينفراقۇرىلىمىن جۇرگىزۋ ماسەلەلەرىنە كومەك كورسەتۋگە، سونداي-اق اكىمشىلىك قولداۋ كورسەتۋگە دايىن. "تاعى ءبىر ماڭىزدى قادام – گاز قۇبىرىنىڭ وتكىزۋ قابىلەتىن ساعاتىنا 1000 تەكشە مەترگە دەيىن ارتتىرا وتىرىپ، ونى قايتا قۇرۋ. بۇدان باسقا، بايبۇلاق كەنتىنەن Oi-Qaragai-عا دەيىن جۇك-جولاۋشىلار تاسىمالى ءۇشىن اۆتوجول سالۋ جوباسى ىسكە اسىرىلاتىن بولادى. سوڭعى ءارى ماڭىزدى قادام – تالعار تراكتىسى - Oi-Qaragai جولىن قايتا جاڭارتۋ، جارىق ورناتۋ", - دەدى رۋستام يساتاەۆ.

"ادىرنا" ۇلتتىق پورتالى