جازۋشى، دراماتۋرگ دۋلات يسابەكوۆ پرەزيدەنتكە ەكىنشى مەرزىمگە سايلاۋعا ءتۇسۋدى ۇسىنعانىن ايتتى، دەپ حابارلايدى "ادىرنا" ۇلتتىق پورتالى.
بۇل تۋرالى جازۋشى «Adal adam» يۋتۋب-ارناسىنا بەرگەن سۇحباتىندا ايتتى.
"كەيدە توقاەۆتىڭ كەيبىر يدەيالارىنىڭ جۇزەگە اسپاي قالاتىنى ەكس-پرەزيدەنتتىڭ اسەرى مە دەپ توپشىلاپ ويلايمىن. ماعان "ەڭبەك ەرى" اتاعىن بەرگەن كەزىندە ءسوز سويلەپ، 30 جىلدىق ولقىلىقتى ءسىز عانا جوياسىز، تاعى جەتى جىل بيلىكتە قالام دەسەڭىز، حالىق قولداعالى تۇر", - دەپ قولداۋ بىلدىرگەنىن اتاپ ءوتتى يسابەكوۆ.
ايتا كەتەيىك، كونستيتۋتسيا بويىنشا ءبىر ادام پرەزيدەنت بولىپ 7 جىلدىق ءبىر-اق مەرزىمگە سايلانا الادى.
سونداي-اق، جازۋشىنىڭ سوزىنشە، ەلىمىزدىڭ 30 جىلدا جەتكەن ادەبيەت پەن مادەنيەتتەگى جەتىستىكتەرىن اتاپ ءوتۋ قيىن. شەت مەملەكەتتەرمەن سالىستىرعاندا ءبىزدىڭ ەلدىڭ تەاترلارىنىڭ دەڭگەيى بيىك سياقتى. بىراق تانىلماي جاتىر. قازاقستاننىڭ ءوزى ەندى-ەندى تانىلىپ كەلە جاتىر.
"ادىرنا" ۇلتتىق پورتالى
