مەملەكەت باسشىسى قاسىم-جومارت توقاەۆ استانا قالاسىنىڭ اكىمى جەڭىس قاسىمبەكتى قابىلدادى، دەپ حابارلايدى «ادىرنا» ءتىلشىسى اقورداعا سىلتەمە جاساپ.
پرەزيدەنتكە ەلوردانىڭ الەۋمەتتىك-ەكونوميكالىق جانە ينفراقۇرىلىمدىق دامۋى تۋرالى باياندالدى.
«جەڭىس قاسىمبەك نەگىزگى ەكونوميكالىق كورسەتكىشتەر بويىنشا وڭ ديناميكا بار ەكەنى جونىندە مالىمەت بەردى. بيىلعى 10 ايدىڭ ىشىندە ءبىر تريلليون تەڭگەدەن استام ينۆەستيتسيا تارتىلعان. جىل سوڭىنا دەيىن جالپى سوماسى 87,7 ميلليارد تەڭگە بولاتىن 25 ينۆەستيتسيالىق جوبانى، سونىڭ ىشىندە وڭدەۋ ونەركاسىبى سالاسىندا 14, ءبىلىم جانە مەديتسيناعا قاتىستى 7, لوگيستيكا باعىتىندا 4 جوبانى ىسكە قوسۋ جوسپارلانىپ وتىر. بۇل باستامالار 1,4 مىڭ جۇمىس ورنىن اشۋعا مۇمكىندىك بەرەدى»،—دەلىنگەن حابارلامادا.
قاسىم-جومارت توقاەۆقا جىلىتۋ ماۋسىمىنىڭ بارىسى تۋرالى دا ايتىلدى. اكىمنىڭ سوزىنشە، بيىل كۇزدە «وڭتۇستىك-شىعىس» گاز جىلۋ ستانتسياسىنىڭ، "تۇران" گاز جىلۋ ستانتسياسىنىڭ ءبىرىنشى كەزەڭىنىڭ جانە ءۇشىنشى جەو-نىڭ ءبىرىنشى كەزەڭىنىڭ قۇرىلىسى اياقتالدى. ەلوردانىڭ تىنىس-تىرشىلىگىن قامتاماسىز ەتەتىن بۇل نىسانداردىڭ قۋاتى – ساعاتىنا 1140 گيگاكالوريا. قالا ۇزاق ۋاقىتتان بەرى العاش رەت بيىلعى جىلىتۋ ماۋسىمىندا جىلۋ ەنەرگياسىنا دەگەن سۇرانىستى ارتىعىمەن قامتاماسىز ەتەتىن بولدى.
پرەزيدەنت شاھار باسشىسىنا الەۋمەتتىك جانە ينجەنەرلىك ينفراقۇرىلىمدى ودان ءارى دامىتۋ جونىندە بىرقاتار تاپسىرما بەردى.
