شقو-عا پاۆلودار مەن شىمكەنت قالالارىنداعى نازارباەۆ زياتكەرلىك مەكتەپتەرىنىڭ ۇزدىك وقۋشىلارى «تۋعان ەلگە تاعزىم» ولكەتانۋ-زەرتتەۋ ەكسپەديتسياسىمەن كەلدى.
اتالعان جوبا «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ باستاماسىمەن تۋعان ولكەنى تانىپ بىلۋگە، وتانسۇيگىشتىك سەزىمدى ارتتىرۋعا باعىتتالعان. بارلىعى 28 وقۋشى ءبىر اپتا بويى وبلىسىمىزداعى تاريحي نىسانداردى، قورىق-مۇراجايلاردى ارالاپ، ءىرى ءوندىرىس ورىندارىنىڭ جۇمىسىمەن تانىس بولادى.
- 2012 جىلدان باستاپ ەلىمىزدە جۇزەگە اسىرىلىپ كەلە جاتقان بۇل جوبا – وقۋشىلارعا تانىمدىق بىلىمدەرىن شىڭداۋعا، عىلىمي جوبالارىن پراكتيكالىق نەگىزدە ازىرلەۋگە مۇمكىندىك بەرەدى. جىل سايىن مەكتەپارالىق بايقاۋلاردا، وليمپيادالار مەن جارىستاردا جەڭىمپاز اتانعان وقۋشىلار ەلىمىزدىڭ ءار وڭىرلەرىنە ولكەتانۋ-زەرتتەۋ ەكسپەديتسياسىنا جولداما الادى، - دەدى وسكەمەن قالاسىنداعى حيميا-بيولوگيا باعىتىنداعى نازارباەۆ زياتكەرلىك مەكتەبىنىڭ ديرەكتورى جۇپات ەرنيازوۆا.
ءبىرىنشى كۇنى ەكسپەديتسيا مۇشەلەرى وسكەمەن قالاسىنداعى «ازيا اۆتو» كاسىپورنىندا بولىپ، «اقباۋىر» تاريحي-ارحەولوگيالىق كەشەنىنە تانىمدىق جولساپار جاسادى. – مەن وسكەمەن قالاسىنا العاش رەت كەلىپ تۇرمىن. وسى ەكسپەديتسيا قۇرامىندا بولعانىما وتە قۋانىشتىمىن. عىلىمي جۇمىسىم ماشينا قۇراستىرۋ سالاسىنا بايلانىستى بولعاندىقتان، ەلىمىزدەگى ءىرى ماشينا جاساۋ زاۋىتى «ازيا اۆتو» كاسىپورنىنىڭ جۇمىسىن كورىپ، وزىمە قاجەت تەحنيكالىق، اقپاراتتىق-تانىمدىق مالىمەت الدىم،- دەدى شىمكەنت قالاسىنىڭ 9 سىنىپ وقۋشىسى سەيتەك باينازار.
الداعى كۇندەرى وقۋشىلار جەتەكشىلەرىمەن بىرگە «اباي-شاكارىم» مەموريالدىق كەشەنىندە، ءىرى اگروونەركاسىپ شارۋاشىلىقتارىندا بولىپ، بالىق اۋلاۋ جانە بال ورتالىقتارىنىڭ جۇمىسىمەن تانىسادى.
"ادىرنا" ۇلتتىق پورتالى
