Şyǧys Qazaqstanda mektep oquşylarynyŋ ölketanu-zertteu ekspedisiiasy bastaldy

ŞQO-ǧa Pavlodar men Şymkent qalalaryndaǧy Nazarbaev ziiatkerlık mektepterınıŋ üzdık oquşylary «Tuǧan elge taǧzym» ölketanu-zertteu ekspedisiiasymen keldı. Atalǧan joba «Nazarbaev Ziiatkerlık mektepterı» derbes bılım beru ūiymynyŋ bastamasymen tuǧan ölkenı tanyp bıluge, otansüigıştık sezımdı arttyruǧa baǧyttalǧan. Barlyǧy 28 oquşy bır apta boiy oblysymyzdaǧy tarihi nysandardy, qoryq-mūrajailardy aralap, ırı öndırıs oryndarynyŋ jūmysymen tanys bolady. - 2012 jyldan bastap elımızde jüzege asyrylyp kele jatqan būl joba – oquşylarǧa tanymdyq bılımderın şyŋdauǧa, ǧylymi jobalaryn praktikalyq negızde äzırleuge mümkındık beredı. Jyl saiyn mekteparalyq baiqaularda, olimpiadalar men jarystarda jeŋımpaz atanǧan oquşylar elımızdıŋ är öŋırlerıne ölketanu-zertteu ekspedisiiasyna joldama alady, - dedı Öskemen qalasyndaǧy himiia-biologiia baǧytyndaǧy Nazarbaev Ziiatkerlık mektebınıŋ direktory Jūpat Erniiazova. Bırınşı künı ekspedisiia müşelerı Öskemen qalasyndaǧy «Aziia Avto» käsıpornynda bolyp, «Aqbauyr» tarihi-arheologiialyq keşenıne tanymdyq jolsapar jasady. – Men Öskemen qalasyna alǧaş ret kelıp tūrmyn. Osy ekspedisiia qūramynda bolǧanyma öte quanyştymyn. Ǧylymi jūmysym maşina qūrastyru salasyna bailanysty bolǧandyqtan, elımızdegı ırı maşina jasau zauyty «Aziia Avto» käsıpornynyŋ jūmysyn körıp, özıme qajet tehnikalyq, aqparattyq-tanymdyq mälımet aldym,- dedı Şymkent qalasynyŋ 9 synyp oquşysy Seitek Bainazar. Aldaǧy künderı oquşylar jetekşılerımen bırge «Abai-Şäkärım» memoriialdyq keşenınde, ırı agroönerkäsıp şaruaşylyqtarynda bolyp, balyq aulau jäne bal ortalyqtarynyŋ jūmysymen tanysady.

"Adyrna" ūlttyq portaly