مينيستر ۋاقىت بەلدەۋىنىڭ وزگەرۋى تۋرالى ايتتى

ساۋدا جانە ينتەگراتسيا ءمينيسترى ارمان شاققاليەۆ بىرىڭعاي ۋاقىت بەلدەۋىنە كوشۋ تۋرالى ايتتى، دەپ حابارلايدى "ادىرنا" ۇلتتىق پورتالى.

"بۇعان دەيىن حابارلاعانداي، ءبىزدىڭ مەملەكەتتىك ورگاندار قاۋلى جوباسىن دايىندادى. جاقىن ارادا شەشىم قابىلدانادى. شەشىم قابىلداۋ ۇستىندەمىز", - دەپ جاۋاپ بەردى ارمان شاققاليەۆ. ونىڭ ايتۋىنشا، ازاماتتار سوڭعى شەشىم تۋرالى ۋاكىلەتتى ورگاننىڭ قاۋلىسى جاريالانعان كەزدە، “شامامەن، جاقىن ارادا” حاباردار بولادى. ەسكە سالايىق، وتكەن جىلدىڭ جەلتوقسان ايىندا “اشىق نقا” پورتالىندا 2000 جىلعى “قازاقستان رەسپۋبليكاسىنىڭ اۋماعىنداعى ۋاقىتتى ەسەپتەۋ ءتارتىبى تۋرالى” قاۋلىعا وزگەرىستەر ەنگىزەتىن ۇكىمەت قاۋلىسىنىڭ جوباسى جاريالانعان بولاتىن. قۇجات قولداۋ تاپسا، استانا، الماتى، شىمكەنت قالالارىندا جانە رەسپۋبليكانىڭ تاعى 12 وبلىسىندا ساعات ءتىلى اۋىستىرىلادى. بۇل رەتتە، استانا، الماتى، شىمكەنت، اباي، اقمولا، الماتى، جامبىل، جەتىسۋ، قاراعاندى، قوستاناي، پاۆلودار، سولتۇستىك قازاقستان، تۇركىستان، ۇلىتاۋ، شىعىس قازاقستان وبلىستارىنىڭ اكىمدىكتەرى 2024 جىلعى 29 اقپانعا قاراعان ءتۇنى 2024 جىلدىڭ 1 ناۋرىزىنا دەيىن (ساعات 00:00) جەرگىلىكتى ۋاقىتتى 1 ساعاتقا ارتقا قويۋ كەرەك.

”ادىرنا” ۇلتتىق پورتالى