قازاقستان قۇراماسى ازيا چەمپيوناتىن كۇمىس جۇلدەمەن اياقتادى، دەپ حابارلايدى "ادىرنا" ءتىلشىسى قر تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتىنە سىلتەپ.
كۋۆەيت استاناسىندا اياقتالعان ازيا چەمپيوناتىندا قازاقستاندىق سپورتشىلار كۇمىس مەدال جەڭىپ الدى.
ستەند اتۋدىڭ سكيت باعدارلاماسىنداعى قازاقستان-1 قۇراماسى التىن مەدال جولىندا قىتاي مەرگەندەرىمەن باسكە ءتۇستى. الايدا ەل سپورتشىلارى بۇل دۋەلدە قارسىلاسقا ەسە جىبەرىپ، 43-45 ۇپايمەن ەكىنشى ورىننان كورىندى.
قولا جۇلدە باحرەين مەن ءۇندىستان قۇراماسىنا بۇيىردى.
وسى تۇستا بۇل جاتتىعۋ جاڭا ەرەجە بويىنشا وتكەنىن ايتا كەتەيىك. جارىس بارىسىندا ءار مەرگەن ادەتتەگىدەي 2 ەمەس، 4 رەتتەن نىسانا كوزدەپ، مەرگەندىك تانىتتى. بۇل ءار پوزيتسيادا 2 وق اتقاننان كەيىن جىلجىپ وتىراتىن شەبەرلەر ءۇشىن توسىن جاي بولعانى انىق.
كەلە جاتقان پاريج وليمپياداسىندا سكيت باعدارلاماسىندا ارالاس جۇپتىق سىندا جۇلدە ساراپقا سالىنادى. الايدا كۋۆەيتتەگى سارى قۇرلىق دوداسىندا ليتسەنزيا ۇلەستىرىلگەن جوق.
قازاقستان قۇراماسى ازيا چەمپيوناتىندا 3 التىن، 1 كۇمىس جانە 4 قولا مەدالمەن جالپى ەسەپتە 2-ورىندى ەنشىلەدى. ال 5 التىنمەن كوش باستاپ تۇرعان قىتاي بولسا، ۇزدىك ۇشتىكتى 2 التىن جۇلدەمەن قىتايدىڭ تايپەيى تۇيىندەدى.
بيىل 35 ەلدەن 350-دەن استام سپورتشى ءوزارا سىنعا ءتۇستى. بۇل قاتاردا 18 قازاقستاندىق اتتاندى.
