اقتوبەلىك قۇتقارۋشىلار ناۋقاستى اۋرۋحاناعا جەتكىزۋ ءۇشىن اقتۇتەك بوراندا 18 شاقىرىم جاياۋ جۇرگەن. بۇل تۋرالى وبلىستىق توتەنشە جاعدايلار دەپارتامەنتى ايتتى، دەپ حابارلايدى «ادىرنا» ءتىلشىسى.
قۇتقارۋشىلاردىڭ ءبىرى، قاراۋىل باستىعى اقداۋلەت ءاليدىڭ مالىمدەۋىنشە، مەديتسينالىق كومەك مۇعالجار اۋدانى ءباسشيلى اۋىلىنىڭ 73 جاستاعى تۇرعىنىنا قاجەت بولعان .
«قاندىاعاش قالاسىنداعى بولىمگە ەڭبەك اۋىلدىق وكرۋگى، ءباسشيلى ەلدى مەكەنىندە 73 جاستاعى ايەل ادامنىڭ اۋىر حالدە جاتقانى تۋرالى حابارلاما ءتۇستى. ونى اۋداندىق اۋرۋحاناعا جەتكىزۋ كەرەك بولدى. ترەكولمەن شىقتىق. اۋا رايىنىڭ قولايسىزدىعىنان كولىك الدىنا ەكى ادامنان كەزەكتەسىپ شىعىپ، جۇگىرىپ وتىرۋعا تۋرا كەلدى. ويتكەنى، قارعا ادىم جەردى كورۋ مۇمكىن ەمەس ەدى. مۇنداي جاعدايلار بولىپ تۇرادى. ەرلىك جاسادىق دەپ ايتا المايمىن. بۇل ءبىزدىڭ مىندەتىمىز»،—دەدى ول.
قۇتقارۋشىلار ءبىر باعىتتىڭ وزىنە 3 ساعاتتان استام جۇرگەن. ولار كەزەكتەسىپ، ءبىر جارىم شاقىرىم سايىن اۋىسىپ وتىرعان. وسىلايشا، ناۋقاستى امان-ەسەن قاندىاعاش قالاسىنداعى اۋرۋحاناعا جەتكىزدى.
<
