قاراعاندىلىق پروكۋرورلار 400-دەن استام ازاماتتىڭ ءۇي كەزەگىندە زاڭسىز تۇرعانىن انىقتادى. بۇل تۋرالى Qazaqstan ارناسى جاريالادى، دەپ حابارلايدى “ادىرنا” ۇلتتىق پورتالى.
مالىمەتكە سايكەس، تۇرعىن ۇيگە مۇقتاج رەتىندە كەزەكتە تۇرعان 33 مىڭ ازاماتتىڭ 454-ءى مەملەكەتتەن باسپانا بەرىلۋى ءتيىس توپقا جاتپايدى. بارلىعى كەزەكتەن الىندى.
سونىمەن قاتار تۇرعىلىقتى اۋدانى زاڭ تالاپتارىنا سايكەس كەلمەيتىن پاتەرلەر انىقتالعان. تاعى يەسى جوق 78 پاتەردى كوممۋنالدىق مەنشىككە قابىلداۋ شارالارى جۇرگىزىلىپ جاتىر. ازاماتتاردىڭ جالعا بەرىلگەن تۇرعىن ۇيلەرگە تولەمدەر بويىنشا قارىزدارى 20 ميلليون تەڭگەگە جەتكەن. قازىر بۇل بويىنشا سوتقا تالاپ-ارىزدار بەرىلدى.
«50 ادامعا زاڭ تالاپتارىنا سايكەس كەلمەيتىن پاتەرلەر بەرىلگەن. يەسىز 78 تۇرعىن ءۇيدى كوممۋنالدىق مەنشىككە قابىلداۋ شارالارى جۇرگىزىلۋدە. اقتوعاي اۋدانىندا مۇقتاج ازاماتتارعا جاعدايى ءورت جانە سانيتارلىق قاۋىپسىزدىك تالاپتارىنا سايكەس كەلمەيتىن 4 تۇرعىن ءۇي ساتىپ الىنعان. وسى اۋداندا ەلەكتر قۋاتىنا قوسىلماعان 2 تۇرعىن ءۇي ساتىپ الىنعان. شاحتينسك قالاسىندا تۇرعىن ءۇيدى جالعا بەرۋ شارتىن زاڭدى دەپ تانۋ تۋرالى جالعان سوت شەشىمىنىڭ نەگىزىندە پاتەردى جەكەشەلەندىرىپ العان. قازىر قىلمىستىق كودەكستىڭ 190-بابى بويىنشا سوتقا دەيىنگى تەرگەۋ باستالدى»، - دەدى وبلىستىق پروكۋراتۋرانىڭ قوعامدىق مۇددەلەردى قورعاۋ باسقارماسىنىڭ اعا پروكۋرورى ەرلان ءتۇسىپوۆ.
