قازاقستاندا العاش رەت «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمى پەداگوگيكالىق شەبەرلىك ورتالىعى افريكا كونتينەنتىندەگى شەتەلدىك ارىپتەستەردى وقىتۋدى باستادى، دەپ حابارلايدى "ادىرنا" ءتىلشىسى.
بۇل ورتالىقتىڭ جاڭا حالىقارالىق جوباسى، ونىڭ اياسىندا قازاقستاندىق زياتكەرلىك تەحنولوگيالاردى جاھاندىق ءبىلىم بەرۋگە تاراتۋ جالعاسۋدا.
ەكى اپتا بويى ءمالاۆيدىڭ ليلونگۆە قالاسىنداعى مۇعالىمدەردىڭ ۇلكەن توبى استاناعا كۇن سايىن ونلاين قوسىلاتىن بولادى. ناليكۋلە⠀(Nalikule College of Education)⠀پەداگوگيكالىق كوللەدجىنىڭ مۇعالىمدەرى ءوز زەرتتەۋ قىزمەتتەرىنە Lesson Study جانە Action Research تاسىلدەرىن ەنگىزۋدىڭ نەگىزگى الگوريتمدەرىن مەڭگەرەدى. مالاۆي وكىلدەرى استانادا ءداستۇرلى دۇنيەجۇزىلىك Lesson Studies قاۋىمداستىعى كونفەرەنتسياسىنىڭ وتەتىنىنەن ەرەكشە شابىتتانعانىن، وعان بارلىعى قاتىسۋدى ارماندايتىنىن مويىندادى.
افريكالىق ارىپتەستەرىمەن نيدەرلاندىنىڭ زۆوللەسىندە WALS ەستافەتاسىن قابىلداۋ كەزىندە تانىستىق، – دەپ اتاپ ءوتتى پەداگوگيكالىق شەبەرلىك ورتالىعىنىڭ ديرەكتورى جانبوتا كابدىكاريموۆا:
سول كەزدە بىرنەشە ەلدىڭ وكىلدەرى ورتالىقتىڭ حالىقارالىق جوبالارىنا قىزىعۋشىلىق تانىتىپ، وقىتۋ تۋرالى ۇسىنىس تاستادى. ورتالىق پارتاسىنا ءبىرىنشى بولىپ ەلوردالىق ناليكۋلە پەداگوگيكالىق كوللەدجىنىڭ وكىلدەرى وتىردى.
ناليكۋلە ءبىلىم بەرۋ كوللەدجى – ۇلتتىق ءبىلىم بەرۋدەگى يننوۆاتسيالىق ورتالىقتاردىڭ ءبىرى، جاراتىلىستانۋ-ماتەماتيكا پاندەرىن وقىتۋعا دەن قويعان.ايتا كەتۋ قاجەت، قىركۇيەك ايىندا استانادا ساباقتى زەرتتەۋگە ماماندانعان ەڭ وزىق ساراپشىلار مەن پراكتيكتەر ءداستۇرلى WALS (دۇنيەجۇزىلىك ساباقتى زەرتتەۋ قاۋىمداستىعى) كونفەرەنتسياسىندا باس قوسادى. قازاقستانعا ۇلىبريتانيا، سينگاپۋر، جاپونيا، فينليانديا، مالايزيا، اۆستريا، قىتاي، امەريكا قۇراما شتاتتارى، گونكونگ، تۇركيا، بارلىعى 50-دەن استام ەلدىڭ وكىلدەرى ۇشىپ كەلەدى دەپ جوسپارلانۋدا. پەداگوگيكالىق شەبەرلىك ورتالىعى ون جىلدان استام وتاندىق جانە الەمدىك ءبىلىم بەرۋگە «Lesson study» جاھاندىق ترەندىن ەنگىزۋمەن تابىستى اينالىسىپ كەلەدى. وقىتۋ ورتالىعىندا وسى جىلدار ىشىندە ءازىربايجان، وزبەكستان، قىرعىزستان، تۇركىمەنستان، ياكۋتيا-ساحا ەلدەرىنەن كەلگەن شەتەلدىك ارىپتەستەر ءبىلىم الدى.
قازىرگى ۋاقىتتا ەۋروپالىق وداقپەن بىرلەسىپ ورتالىقتىڭ تاعى ءبىر حالىقارالىق جوباسى – تاجىكستاننىڭ ءبىلىم جانە عىلىم مينيسترلىگىنە، سونداي-اق ءۋالاياتتاردىڭ پەداگوگيكالىق سالانىڭ بولىمدەرىنە ارنالعان «بولاشاق پەداگوگيكاسى: زاماناۋي مەكتەپتەردىڭ شەشىمدەرى» اتتى تاقىرىپتىق سەمينار جوسپارلانعان.
