بۇگىننەن باستاپ «مايقايىڭالتىن» كەن بايىتۋ فابريكاسى جۇمىسىن توقتاتتى. سەبەبى، قورداعى التىن رۋداسى تاۋسىلعان، ال جەر استىنداعى قازۋعا ازىرگە رۇقسات جوق، دەپ حابارلايدى “ادىرنا” ۇلتتىق پورتالى Qazaqstan ارناسىنا سىلتەپ.
«الداعى التى جىلعا دايىندالعان 1 ملن توننادان استام شيكىزات جەردىڭ استىندا جاتىر. ازىرگە ونى شىعارۋعا رۇقسات جوق. سەبەبى، قاڭتاردىڭ 3-نەن 4-نە قاراعان تۇنگى اپاتتان سوڭ، شاحتالاردا جۇمىس ىستەۋگە تىيىم سالىنعان بولاتىن. ال كەنشىلەر 1,5 ايدان بەرى جاپپاي ەڭبەك دەمالىسىندا. ەندى ولارعا فابريكا ىشىندەگى ماماندار قوسىلدى. جۇمىسسىز قالعانداردىڭ جالپى سانى - 1100 ادام. ولاردىڭ ارى قارايعى تاعدىرى نە بولارى وسى 1-2 كۇندە شەشىلەدى»، - دەيدى Qazaqstan ارناسىنا تەلەفون ارقىلى رەسمي جاۋاپ بەرگەن كاسىپورىننىڭ باس ديرەكتورىنىڭ كەڭەسشىسى ورىنجان قابدولوۆ.
ەسكە سالساق، جىل باسىندا فابريكا اۋماعىندا توپىراقتىڭ وپىرىلۋىنان پايدا بولعان شۇڭقىرعا 4 ادامى بار اۆتوبۋس قۇلاعان بولاتىن. ەكى قۇتقارۋشىنىڭ دەنەسى سىرتقا شىعارىلدى. تاعى ەكى ادام ءالى ىزدەستىرىلىپ جاتىر.
«مايقايىڭالتىن» كەن بايىتۋ فابريكاسى 10 مىڭنان اسا حالقى بار مايقايىڭ كەنتىندەگى تۇرعىنداردى جۇمىسپەن قامتىپ وتىرعان نەگىزگى جۇيە قۇراۋشى كاسىپورىن بولىپ ەسەپتەلەدى.
