Búginnen bastap «Maıqaıyńaltyn» ken baıytý fabrıkasy jumysyn toqtatty. Sebebi, qordaǵy altyn rýdasy taýsylǵan, al jer astyndaǵy qazýǵa ázirge ruqsat joq, dep habarlaıdy “Adyrna” ulttyq portaly Qazaqstan arnasyna siltep.
«Aldaǵy alty jylǵa daıyndalǵan 1 mln tonnadan astam shıkizat jerdiń astynda jatyr. Ázirge ony shyǵarýǵa ruqsat joq. Sebebi, qańtardyń 3-nen 4-ne qaraǵan túngi apattan soń, shahtalarda jumys isteýge tyıym salynǵan bolatyn. Al kenshiler 1,5 aıdan beri jappaı eńbek demalysynda. Endi olarǵa fabrıka ishindegi mamandar qosyldy. Jumyssyz qalǵandardyń jalpy sany - 1100 adam. Olardyń ary qaraıǵy taǵdyry ne bolary osy 1-2 kúnde sheshiledi», - deıdi Qazaqstan arnasyna telefon arqyly resmı jaýap bergen kásiporynnyń bas dırektorynyń keńesshisi Orynjan Qabdolov.
Eske salsaq, jyl basynda fabrıka aýmaǵynda topyraqtyń opyrylýynan paıda bolǵan shuńqyrǵa 4 adamy bar avtobýs qulaǵan bolatyn. Eki qutqarýshynyń denesi syrtqa shyǵaryldy. Taǵy eki adam áli izdestirilip jatyr.
«Maıqaıyńaltyn» ken baıytý fabrıkasy 10 myńnan asa halqy bar Maıqaıyń kentindegi turǵyndardy jumyspen qamtyp otyrǵan negizgi júıe quraýshy kásiporyn bolyp esepteledi.
