قوستاناي وبلىسىندا وقۋشىلاردىڭ 27,3 پايىزى مەملەكەتتىك تىلدە ءبىلىم الادى. بۇل تۋرالى وبلىس اكىمى قۇمار اقساقالوۆ Kazinform اگەنتتىگىنە بەرگەن سۇحباتىندا ايتتى، دەپ حابارلايدى «ادىرنا» ءتىلشىسى.
«وڭىردە جالپى كونتينگەنتى 111 818 وقۋشىسى بار 445 مەملەكەتتىك مەكتەپ جۇمىس ىستەپ جاتىر، ونىڭ ىشىندە مەملەكەتتىك تىلدە وقىتاتىن سىنىپتاردا وقۋشىلاردىڭ 27,3% ءبىلىم الىپ وتىر.
مەملەكەتتىك تىلدە وقىتاتىن مەكتەپتەر مەن بالالار كونتينگەنتىن ۇلعايتۋ ماسەلەسى وبلىس اكىمدىگىنىڭ كۇن تارتىبىنەن تۇسكەن ەمەس. مەملەكەتتىك تىلدە ءبىلىم الۋشىلار كونتينگەنتىن ۇلعايتۋ ماقساتىندا 2021-2025 جىلدارعا ارنالعان مەملەكەتتىك تىلدە ءبىلىم بەرۋ ۇيىمدارىنىڭ جەلىسىن جانە ءبىلىم الۋشىلار كونتينگەنتىن ۇلعايتۋ جونىندەگى جول كارتاسى ءۇشىنشى جىل ىسكە اسىرىلىپ جاتىر»،—دەدى ول.
ايتۋىنشا، ءۇش جىل ىشىندە مەكتەپكە دەيىنگى ءبىلىم بەرۋ ۇيىمدارىندا مەملەكەتتىك تىلدە وقىتاتىن 61 توپ اشىلعان. بۇدان بولەك، ورىس مەكتەپتەرىندە قازاق سىنىپتارىن اشۋ ماسەلەسى دە قولعا الىنعان.
«2022-2023 وقۋ جىلىندا ورىس تىلىندە وقىتاتىن قوستاناي قالاسىنىڭ فيزيكا-ماتەماتيكا ليتسەيى، قوستاناي اۋدانىنىڭ مايكول جببم، جۋكوۆ نوم جانە رۋدنىي قالاسىنىڭ № 12 جببم جانە № 4 مەكتەپ-ليتسەيى ىسپەتتى 5 مەكتەپتە قازاق سىنىپتارى اشىلدى. سونداي-اق قوستاناي قالاسىنداعى №115 ارالاس تىلدە ءبىلىم بەرەتىن مەكتەبى تولىقتاي مەملەكەتتىك تىلگە كوشىرىلدى.
قازىرگى كەزدە، اتا-انالار اراسىندا مەملەكەتتىك ءتىلدىڭ ماڭىزدىلىعىنا قاتىستى ءتۇسىندىرۋ جۇمىستارى جۇرگىزىلىپ جاتىر. بۇل ماسەلەنى، بارشامىز – قوعام، جەرگىلىكتى اتقارۋشى ورگاندار مەن اتا-انالارمەن بىرلەسە وتىرىپ شەشەمىز دەگەن ۇمىتتەمىز»،—دەپ ءسوزىن تولىقتىردى اكىم.
