Qostanai oblysynda oquşylardyŋ 27,3 paiyzy memlekettık tılde bılım alady. Būl turaly oblys äkımı Qūmar Aqsaqalov Kazinform agenttıgıne bergen sūhbatynda aitty, dep habarlaidy «Adyrna» tılşısı.
«Öŋırde jalpy kontingentı 111 818 oquşysy bar 445 memlekettık mektep jūmys ıstep jatyr, onyŋ ışınde memlekettık tılde oqytatyn synyptarda oquşylardyŋ 27,3% bılım alyp otyr.
Memlekettık tılde oqytatyn mektepter men balalar kontingentın ūlǧaitu mäselesı oblys äkımdıgınıŋ kün tärtıbınen tüsken emes. Memlekettık tılde bılım aluşylar kontingentın ūlǧaitu maqsatynda 2021-2025 jyldarǧa arnalǧan memlekettık tılde bılım beru ūiymdarynyŋ jelısın jäne bılım aluşylar kontingentın ūlǧaitu jönındegı jol kartasy üşınşı jyl ıske asyrylyp jatyr»,—dedı ol.
Aituynşa, üş jyl ışınde mektepke deiıngı bılım beru ūiymdarynda memlekettık tılde oqytatyn 61 top aşylǧan. Būdan bölek, orys mektepterınde qazaq synyptaryn aşu mäselesı de qolǧa alynǧan.
«2022-2023 oqu jylynda orys tılınde oqytatyn Qostanai qalasynyŋ fizika-matematika liseiı, Qostanai audanynyŋ Maiköl JBBM, Jukov NOM jäne Rudnyi qalasynyŋ № 12 JBBM jäne № 4 mektep-liseiı ıspettı 5 mektepte qazaq synyptary aşyldy. Sondai-aq Qostanai qalasyndaǧy №115 aralas tılde bılım beretın mektebı tolyqtai memlekettık tılge köşırıldı.
Qazırgı kezde, ata-analar arasynda memlekettık tıldıŋ maŋyzdylyǧyna qatysty tüsındıru jūmystary jürgızılıp jatyr. Būl mäselenı, barşamyz – qoǧam, jergılıktı atqaruşy organdar men ata-analarmen bırlese otyryp şeşemız degen ümıttemız»,—dep sözın tolyqtyrdy äkım.
