26 myŋnan asa oqyrmandy bırıktırgen ideia. Oqudy ūmyttyrmau ūtymdy

772
Adyrna.kz Telegram
https://www.adyrna.kz/storage/uploads/abNpDdfS2S4eihQp1RushutF1NYWa6Z4pfkPAfyF.jpg

PARAQTA jobasynyŋ negızın qalaǧan Erdäulet Qūralmen joba qalai bastalǧanyn, oqyrmandy kıtapty soŋyna deiın oquǧa ne itermeleitının jäne platformanyŋ aldaǧy josparlaryn äŋgımeledık.

Astanadaǧy şaǧyn oqyrmandar klubyna arnalyp jasalǧan Telegram-bot bır jyldan asa uaqytta 26 myŋnan astam adam tırkelgen sifrlyq platformaǧa ainaldy. Paidalanuşylar osy uaqytqa deiın 1,5 million betten astam kıtap oqyǧan. 

Kıtap oquǧa uaqyt tabu, bastaǧan kıtapty aiaqtau, oqudy kündelıktı ädetke ainaldyru köp adamǧa tanys qiyndyq. Endı būl prosestı jüielep, oqyrmannyŋ nätijesın körsetıp otyratyn sifrlyq qūraldar köbeiıp keledı. Solardyŋ bırı – otandyq PARAQTA platformasy. Ol oqyrmanǧa oquǧa jūmsaǧan uaqytyn eseptep, statistikasyn baqylauǧa jäne kıtap turaly pıkır almasuǧa mümkındık beredı.

Joba avtory Erdäulet Aianūly qūrylys salasynda tört jylǧa juyq jūmys ıstegen. Bıraq kıtapqa degen jeke qyzyǧuşylyǧy uaqyt öte kele jaŋa bastamaǧa ainalǧan.

BIR KLUBTYŊ QAJETTILIGINEN TUǦAN BOT

Joba bır adamnyŋ ideiasynan emes, belgılı bır toptyŋ qajettılıgınen bastalǧan.

«Platformanyŋ qūrylǧanyna bır jyl ekı aidai boldy. Bastapqyda Astanada özımızdıŋ oqyrmandar klubymyz bar edı. Sol adamdardyŋ oqu statistikasyn baqylauǧa, tūraqty ädet qalyptastyruǧa kömektesu üşın Telegram-bot jasadyq. Keiın oǧan basqa oqyrmandar da qyzyǧuşylyq tanytty. Sodan botty köpşılıkke aştyq. Sol kezde bolaşaqta sait nemese qosymşa jasau kerek degen oi tudy», - deidı Erdäulet.

Alǧaşynda jobanyŋ naqty tūjyrymdamasy bolmaǧan. Avtordyŋ oiynda tek oqyrmanǧa oqu barysyn tırkeitın qarapaiym qūral jasau maqsaty tūrǧan. Paidalanuşylar köbeiıp, olardan jaŋa ötınışter tüsken saiyn jobanyŋ mümkındıkterın keŋeitu qajet bolǧan.

BANKROTQA ŪŞYRAǦAN KOFEHANA BERGEN SABAQ

Jobanyŋ onlainǧa köşuıne avtordyŋ būrynǧy käsıpkerlık täjıribesı de äser ettı. Erdäulet bır kezderı kıtap dükenı men kofehanany bırıktırgen biznes aşqan, bıraq ol ūzaqqa sozylmaǧan.

«Būryn kofehana men kıtap dükenı bırıkken biznesımız boldy. Bıraq qarjylyq mäselelerge bailanysty jabuǧa mäjbür boldyq. Sodan keiın osy formatty oflainnan onlainǧa köşıru turaly oi keldı. PARAQTA jobasyna köbırek köŋıl böle bastadyq. Şamamen üş-tört aidan keiın sait jasauǧa kırıstık. Ony äzırleude jasandy intellektınıŋ kömegın paidalandyq. Qazır saittyŋ jūmys ıstep kele jatqanyna jarty jyldai boldy», - deidı joba avtory.

Bastapqy nūsqa men bügıngı platformanyŋ arasy alşaq. Qazır PARAQTA tek oqu uaqytyn tırkeitın qūral emes.

TAIMER, JEKE SÖRE JÄNE STATİSTİKA

Platformanyŋ jūmys tärtıbı qarapaiym. Oqyrman kıtap aşqanda taimerdı qosady, oqyp bolǧan soŋ oqyǧan bet sanyn engızedı. Qaǧaz kıtaptardy atauy men avtory boiynşa jeke söresıne qosyp qoiuǧa bolady. Elektrondy kıtaptardy platformanyŋ özınde oquǧa nemese PDF, EPUB formatynda jükteuge bolady.

«Osy derekterdıŋ negızınde är paidalanuşynyŋ jeke statistikasy jasalady. Ol ailyq jäne jyldyq nätijelerın salystyryp, oqu qarqynyn baqylai alady», - deidı Erdäulet.

«STREIKTI ÜZBEU ÜŞIN KÜNINE BES BET BOLSA DA OQİDY»

Erdäulettıŋ aituynşa, oqyrmannyŋ kündelıktı belsendılıgın arttyruǧa oiyn elementterı köp kömektesken.

«Kıtapty soŋyna deiın oqytuǧa arnalǧan türlı mehanizmder bar. Mysaly, bırneşe kün qatarynan oqysaŋyz, streik jinalady. Bır kün oqymai qalsaŋyz, ol üzıledı. Oqyrman sol körsetkışın joǧaltpau üşın künıne bes bet bolsa da oquǧa tyrysady. Mūndai jüienı Duolingo siiaqty qosymşalardan baiqadyq. Kündelıktı belsendılıktı saqtauǧa arnalǧan būl täsıl jaqsy jūmys ısteidı eken. Sondyqtan ony özımızge engızdık. Platformada oqyrman neǧūrlym köp kıtap oqysa, soǧūrlym jūldyzşa jinaidy. Jinaǧan jūldyzşalaryn jeke paraqşasyn bezendıruge jūmsai alady. Osylaişa, şaǧyn jetıstıkter men marapattar arqyly oqyrmannyŋ kıtapqa degen qyzyǧuşylyǧyn arttyryp, oquǧa degen yntasyn oiatuǧa bolady », - deidı ol.

Bügınde auyz toltyryp aitarlyqtai nätijesı de joq emes. Platformada 300 künnen astam uaqyt boiy kün saiyn kıtap oqyp kele jatqan bırneşe paidalanuşy bar, 100 kündık mejeden asqandar da az emes. Jüie oqyrmanǧa «Kıtap oqudy ūmytpaŋyz», «Şamyŋyzdy söndırmeŋız» degen eske salǧyş habarlamalardy da avtomatty türde jıberıp otyrady.

Avtor üşın būl körsetkışter platformanyŋ dūrys baǧytta ekenın körsetedı. Bastapqyda tek oqylǧan bettı tırkeitın bot endı adamnyŋ oqu tärtıbın qalyptastyruǧa kömektesetın qūralǧa ainaldy.

«JALǦYZ OQYǦANNAN BIRGE OQYǦAN QYZYǦYRAQ»

PARAQTA-da jeke statistikadan bölek, bırge oqu mümkındıgı de bar. Paidalanuşy dostaryn nemese tanystaryn jinap, öz oqyrmandar klubyn aşa alady. Klub ışınde är qatysuşynyŋ nätijesı körınıp, ışkı reiting jasalady.

«Oqyrman klubtary jaqsy kömektesıp jatyr. Är adam öz jaqyndaryn tartyp, kıtapty bırge oqu üşın klub aşady. Olardyŋ arasynda ışkı reiting bar, būl tūraqtylyqqa da äser etedı. Jalǧyz oqyǧannan görı bırneşe adammen bırge oqu qyzyǧyraq. Bır-bırıŋnıŋ nätijelerıŋdı köresıŋ, sol arqyly özıŋ de oquǧa yntalanasyŋ», - deidı Erdäulet.

Qazır platformada 180-nen astam oqyrmandar kluby qūrylǧan. «Dostar» funksiiasyn 600-den astam adam paidalanady. Paidalanuşy jaŋa kıtap bastasa, dostaryna habarlama barady. Bır-bırıne künıne bır ret kıtap oqudy eske salyp qoiuǧa da bolady.

Jaqynda platformada «Paraqtau» bölımı ıske qosylǧan. Onda basqa oqyrmandardyŋ kıtaptarǧa jazǧan pıkırlerı bır lentaǧa jinalady. Paidalanuşy özgelerdıŋ oiyn oqyp, kelesı kıtabyn taŋdaǧanda sony eskere alady.

Joba avtorynyŋ aituynşa, bügınde PARAQTA-da 26 myŋnan astam paidalanuşy tırkelgen, al olar engızgen oqu nätijelerınıŋ jiyntyǧy 1,5 million betten asqan. Būl derekter platformanyŋ ışkı statistikasyna negızdelgen.

QOR TAPŞYLYǦY

Auditoriia ösken saiyn şeşıluı tiıs mäseleler de köbeiedı. Sonyŋ eŋ bastysy – elektrondy kıtaptardyŋ azdyǧy. Qazır platforma kıtaphanasyna 148 şyǧarma jüktelgen. Olardyŋ qatarynda qazaq halyq ertegılerı, Abaidyŋ qara sözderı, orys jäne aǧylşyn tılındegı kıtaptar, sondai-aq audarma tuyndylar bar. Oqyrmandar öz kıtaptaryn PDF nemese EPUB formatynda jüktei alady. Bıraq ortaq kıtaphanany tolyqtyru üşın avtorlyq qūqyq talaptaryn saqtau kerek.

«Qazır kıtaphanada qoǧam igılıgıne berılgen 148 kıtap qana bar. Kıtap qoryn köbeitu kerek, äsırese qazaq tılındegı şyǧarmalar boiynşa jūmys ısteuımız qajet. Bıraq avtorlyq qūqyqty da eskeruımız kerek. Kez kelgen kıtapty rūqsatsyz ornalastyra almaimyz», - deidı Erdäulet.

MİNİSTRMEN KEZDESU: QANDAI QOLDAU UÄDE ETILDI?

Osy mäselenı şeşu jäne jobany keŋınen tanystyru üşın komanda Mädeniet jäne aqparat ministrı Arman Qyryqbaevpen kezdesken. Jüzdesude kıtap qoryn tolyqtyru, jobany aqparattyq tūrǧydan qoldau jäne tanystyrylym ötkızu mäselelerı talqylanǧan.

«Ministr Arman Orazbaiūlymen kezdesıp, jobamyzdaǧy mäselelerdı aittyq. Ol kısı qoldau körsetuge uäde berdı. Naqtyraq aitsaq, kıtap qory boiynşa qiyndyqtarymyz bar ekenın jetkızdık. Astana men Almatyda oflain prezentasiia ötkızuge kömektesetınderın aitty. Qazır aqparattyq qoldau da körsetılıp jatyr», – deidı joba avtory.

Diana Asan

«Adyrna» ūlttyq portaly

 

Pıkırler