كولىك جۇرگىزۋشىلەرى "قازاۆتوجولدىڭ” جۇمىسى ساپاسىز ەكەندىگىن ايتىپ، پرەمەر-مينيسترگە شاعىمداندى، دەپ حابارلايدى “ادىرنا” ۇلتتىق پورتالى Kolesa.kz سايتىنا سىلتەمە جاساپ.
بيىلعى قىستىڭ سۋىعى مەن قالىڭ قاردىڭ اسەرىنەن تاس جولدار دۇرىس تازالانباعان، سالدارىنان جول قوزعالىسى قيىنداعان. وسى سەبەپتى كولىك جۇرگىزۋشىلەرى “قازاۆتوجولدىڭ” جۇمىسى ساپاسىز ەكەندىگىن ايتىپ، پرەمەر-مينيسترگە شاعىم تۇسىرگەن.
«جولعا قىزمەت كورسەتۋ دەڭگەيى وتە تومەن. جولداردى تازالامايدى. ناشار جول بولىكتەرىنە ارنايى تەحنيكا بارمايدى. جول جاپقاندى عانا بىلەدى. سودان ۇزىن-سونار كەپتەلىس پايدا بولادى. قار قۇرساۋىندا قالعان تاسىمالداۋشىلار اپتالاپ جولدا تۇر، بۇل جۇرگىزۋشىلەر ومىرىنە قاۋىپتى، ءارى جانارماي كوپ كەتەدى، زات دىتتەگەن جەرىنە كەشىگىپ جەتەدى. ونىڭ ۇستىنە جولدا قالعاندار قاجەت ونىمدەردى وتە قىمبات ساتىپ الادى، مىسالى، نان – 1000 تەڭگە، سۋ – 1500 تەڭگە»، – دەلىنگەن حالىقارالىق اۆتوتاسىمالداۋشىلار وداعىنىڭ (قازاتو) مۇشەلەرى پرەمەر-مينيستر مەن كولىك مينيسترىنە جولداعان ۇندەۋىندە.
ال "قازاۆتوجولدىڭ" ايتۋىنشا، جامبىل وبلىسى مەركى اۋدانىنداعى قاينار جانە اسپارا كەنتتەرى اراسىنداعى جولدا اقاۋلار پايدا بولعان. اتالعان ۋچاسكەدە اعىمداعى جىلدىڭ قاڭتار ايىنان باستاپ جابىن مەن بەتوننىڭ قورعانىش قاباتىنىڭ بۇزىلۋى، سونداي-اق بويلىق جانە كولدەنەڭ تىگىستەر بويىندا شۇڭقىرلار پايدا بولعان. مۇنىڭ ءبارى قاردىڭ كوپ ءتۇسۋى مەن اۋا تەمپەراتۋراسىنىڭ كۇرت وزگەرۋىنە بايلانىستى. جولشىلار اۋا-رايى رەتتەلگەندە جولداردى جوندەۋ جۇمىستارىن باستايتىندارىن ايتىپ، ۋادە بەردى.
“ادىرنا” ۇلتتىق پورتالى
