قاراعاندى وبلىسىندا قولايسىز اۋا رايىنا بايلانىستى رەسپۋبليكالىق ماڭىزى بار قاراعاندى–استانا اۆتوجولى ۋاقىتشا جابىلدى، دەپ حابارلايدى "ادىرنا" ۇلتتىق پورتالى.
بۇل تۋرالى 13 جەلتوقسانعا قاراعان ءتۇنى وبلىستىق پوليتسيا دەپارتامەنتىنىڭ ءباسپاسوز قىزمەتى حابارلادى.
ۆەدومستۆو مالىمەتىنشە، وڭىردە تەمپەراتۋرانىڭ كۇرت اۋىتقۋى مەن اۋا رايىنىڭ ناشارلاۋىنا بايلانىستى جولداردا كوكتايعاق پايدا بولعان. كۇندىز اۋا جىلىنعانىمەن، كەشكى ۋاقىتتا جاۋىن-شاشىننىڭ ءتۇسۋى مەن جەلدىڭ كۇشەيۋى سالدارىنان تەمپەراتۋرا قايتا تومەندەپ، جول بەتى مۇزداعان.
جول قوزعالىسى قاۋىپسىزدىگىن قامتاماسىز ەتۋ ماقساتىندا بارلىق باعىتتا باقىلاۋ كۇشەيتىلىپ، پاترۋلدىك پوليتسيا باتالونىنىڭ قوسىمشا ەكيپاجدارى جۇمىلدىرىلعان.
«جول قاۋىپسىزدىگىن قامتاماسىز ەتۋ ءۇشىن باعىتتارعا 30 پوليتسيا ناريادى شىعارىلدى. ولار ءتۇسىندىرۋ جۇمىستارىن جۇرگىزىپ، جۇرگىزۋشىلەرگە ساقتىق شارالارىن قاتاڭ ساقتاۋ قاجەتتىگىن ەسكەرتۋدە»، – دەدى قاراعاندى وبلىسى پد پاترۋلدىك پوليتسيا باتالونىنىڭ كومانديرى مەدەت نۇرمۇحانوۆ.
سونداي-اق تۇنگى ساعات 02:00-دەن باستاپ پاترۋلدىك پوليتسيا قىزمەتكەرلەرى تەمىرتاۋدان اقمولا وبلىسىنىڭ شەكاراسىنا دەيىن شامامەن 300 كولىكتى الىپ ءجۇرىپ وتكەن.
پوليتسيا قازاقستاندىقتاردى اۋا رايى تۇراقتالعانعا دەيىن الىس جولعا شىقپاۋعا جانە قاۋىپسىزدىك تالاپتارىن قاتاڭ ساقتاۋعا شاقىردى.
