استانا قالاسى اكىمدىگىنىڭ مۋزىكالىق جاس كورەرمەن تەاترىنىڭ بەلدى اكتريسالارىنىڭ ءبىرى، دۇيسەن ماقپالدى كورەرمەن قاۋىم جاقسى تانيدى. ءاردايىم ەڭبەكقورلىقتى، تالماي ىزدەنىستى جاقسى كورەتىن ماقپال زامانداسىمىز حالىق جۇرەگىنەن جول تابا ءبىلدى. ءوز باسىم ماقپالدى سوناۋ قىزىقتى ساتتەرگە تولى، ستۋدەنتتىك شاقتان تانيمىن.
بارلىعىمىز 2016 جىلى قازىرگى ك.بايسەيتوۆا اتىنداعى قازاق ۇلتتىق ونەر ۋنيۆەرسيتەتىنە وقۋعا ءتۇسىپ، ءبىر-بىرىمىزبەن تانىس بولدىق. ول كەزدەرى ونەر وردامىزدا كورنەكتى تەاتر سىنشىسى، قر ەڭبەك سىڭىرگەن قايراتكەرى، پروفەسسور، اشىربەك تورەبايۇلى سىعاي اتا ۇستازىمىز نەگىزىن قالاپ كەتكەن «ەس-ايماق» مادەني-تانىمدىق بىرلەستىگى قارقىندى تۇردە ۇيىمداستىرىلاتىن. جاڭا وقۋ جىلىنىڭ العاشقى «ەس-ايماعىنىڭ» قۇرمەتتى قوناعى بولىپ، اقىن قالقامان سارين كەلەتىن بولدى. ءبىزدىڭ بولمەگە جوعارى كۋرس وقيتىن، كۇناي ەسىمدى قىز، قولىڭا گيتاراسىن اسىنعان ماقپالدى ەرتە كەلدى. ونداعى ويى ۇيىمداستىرۋشىلارعا ماقپالدىڭ داۋىسىن تىڭداتىپ، اتالمىش شاراعا قاتىستىرۋ. ماقپال گيتارامەن اقىن سوزىنە جازىلعان مەدەت سالىقوۆتىڭ «جىبەك سەزىم» اۋەنىن ورىندادى. ماقپالدىڭ داۋىسىن ەستىپ، بارشامىز ءتانتى بولدىق. قالقامان سارينمەن كەزدەسۋدە ماقپالدىڭ داۋىسى كۇللى زالدى ەلتىتتى، تىڭدارماننىڭ جۇرەگىنە جول تاپتى. قر ەڭبەك سىڭىرگەن قايراتكەرى، جاڭاشىل رەجيسسەر، ۇلاعاتتى ۇستاز اسحات ماكسيمۇلى ماەميروۆ-ماقپالدىڭ ونەردەگى اكەسى دەسەك، ارتىق ايتقاندىق ەمەس. ويتكەنى، ماقپالدىڭ ۇلكەن ساحناعا جول تاۋىپ، بەلەستەرگە قول جەتكىزۋگە ونەردەگى اكەسىنىڭ ەڭبەگى زور.
ۇستازدىڭ تاعىلىمدى ءتالىمى، باعىت-باعدارى شاكىرت ماقپال ءۇشىن ۇلكەن ازىق بولدى. ماقپالدىڭ تەاتر ساحناسىندا ەڭ العاش تۇساۋىن كەسكەن دە، اسحات ماكسيمۇلى بولاتىن. 2017 جىلى «Astana Musical» تەاترىندا ج.پرەسگيۋۆنيكتىڭ «رومەو-دجۋلەتتا» ميۋزيكلى ساحنالانىپ، دجۋلەتتا بەينەسى ماقپالدىڭ دەبيۋتتىك بەينەسى بولدى.
«استانا-ماحابباتىم مەنىڭ» ميۋزيكلى كورەرمەنگە جول تارتتى.
اتالعان قويىلىمدا ماقپال باستى كەيىپكەر جاناردى نۇسقالادى. تالانتتى اكتەر سالامات مۇقاشەۆ ەكەۋى ۇيلەسىمدى تاندەم جاساپ، تەاتر الەمىندەگى ەرەكشە سپەكتاكلدەردىڭ ءبىرى بولدى. ماقپال استانا قالاسى اكىمدىگىنىڭ مۋزىكالىق جاس كورەرمەن تەاترىنىڭ نەگىزىن سالۋشىلاردىڭ ءبىرى. مۇنداعى «اباي-توعجان» دراماسىنداعى كەرىمبالا، «قىز جىبەك» ەتنو-فولكلورلىق ميۋزيكلىندە قىز جىبەك، “قوشتاسقىم كەلمەيدى” دراماسىنداعى كوزلوۆا جانە تاعى دا باسقا كەيىپكەرلەرمەن تولىعىپ ءجۇر. كەرىمبالا-توعجاننىڭ جەڭگەسى. اباي مەن توعجاننىڭ قوسىلۋىنا تىلەۋلەس جاننىڭ ءبىرى. ماقپال-ويناقى كوز، قۋاقى ءسوز ارقىلى كەرىمبالا بەينەسىنە جان ءبىتىرىپ، تۇرلەندىرەدى. توعجان-نازىك، ۇياڭ، ۇيالشاق بولسا، كەرىمبالا بۇعان قاراما-قارسى وبراز. پىسىق، العىر، سوزگە شەشەن كەرىمبالا-ماقپال قويىلىمداعى بىرىكتۋشى كەيىپكەر. مۋزىكالىق جاس كورەرمەندەر تەاترىندا ع.مۇسىرەپوۆ پەن ە.برۋسۋلوۆسكيدىڭ «قىز جىبەك» ەتنو-فولكلورلىق ميۋزيكلىندە قىز جىبەكتى ءار اكتريسا ءار ءتۇرلى بەينەلەيدى. ال ماقپالدىڭ «قىز جىبەگى»-ەكى ەلدىڭ بىرلىگىن ويلاعان، تاتۋلىقتى ويلاعان جان رەتىندە كورىنەدى. ماقپال ويىنىندا تەك قانا نازىكتىك عانا ەمەس، بەيبىتشىلىكتى، كەلىسىمدى قالاعان قازاق قىزى جاتىر. ماقپالدىڭ ساحناداعى كەيىپكەرلەرى ءبىر-بىرىنە ۇقسامايدى. ءاردايىم دارالانىپ تۇرادى. بۇل اكتريسا ءۇشىن قاجەتتىلىكتتەردىڭ ءبىرى. ماقپال وسىنى تەرەڭ ۇعىنا العان.
ا.ءۆولوديننىڭ «قوشتاسقىم كەلمەيدى» دراماسى قازىرگى كەزدەگى وزەكتى ماسەلەلەردىڭ ءبىرى شاڭىراقتىڭ شايقالۋىن قوزعايدى. اكتۋالدى قويىلىمدا ماقپال «كوزلوۆا» بەينەسىن جاسايدى. كوزلوۆا-ونەر مەن ءومىر ساحناسىن شاتاستىرىپ جۇرگەن ايەل. كۇيەۋىن ۇعىنعىسى، تۇسىنگىسى كەلمەيدى. وتباسىنان نە بولىپ جاتقانىن بەيحابار. ماقپال-كوزلوۆا ارقىلى قوعامداعى ءوزىن جوعالتقان كەلىنشەكتىڭ بولمىسىن ايقىندايدى. ماقپال-ءار ءرولى ارقىلى جاڭا ءومىر ءسۇرىپ، كورەرمەنگە ەرەكشە اسەر سىيلايتىن اكتريسا. ماقپال-شەكارا اسىپ، ءوزىنىڭ اتا جۇرتىنا كەلىپ، ءومىر مەن ونەر سالاسىندا ءوز باقىتىن تاپتى. ورلەي بەر، زاماناس، اسۋلارىڭ ازايماسىن!
باحتيار تۇرسىن
تەاترتانۋشى
