2017 جىلى مامىر ايىندا بىزدەر قازاق ۇلتتىق ونەر ۋنيۆەرسيتەتىنىڭ 1 كۋرسىن اياقتاپ، جازعى ەمتيحانىمىزدى تاپسىرىپ بولعان كەزىمىز ەدى. ول جىلدارى بولاشاق اكتەر زامانداستاستارىمىزدىڭ ەمتيحانداعى ويىندارىن كورىپ، ءبىر-بىرىمىزبەن پىكىر الماساتىنبىز.
سول ەمتيحاننىڭ بىرىندە قر ەڭبەك سىڭىرگەن قايراتكەرى اسحات ماەميروۆ جەتەكشىلىك ەتەتىن «مۋزىكالىق تەاتر اكتەرى» ماماندىعىنىڭ 1 كۋرس ستۋدەنتتەرىنىڭ ەمتيحانىن تاماشالادىق. اتالمىش كۋرستىڭ ەرەكشەلىگى ولار باعدارلاماعا سايكەس، ەتيۋد ەمەس، شىعارمالاردان ءۇزىندى ياعني 2 كۋرستىڭ باعدارلاماسىن يگەرگەنىن بايقادىق. بۇل سول ۋاقىتتاردا ۋنيۆەرسيتەتىمىزدىڭ تاريحىندا بولماعان قۇبىلىس بولدى. كۋرس جەتەكشىسى، قر ەڭبەك سىڭىرگەن قايراتكەرى، اسحات ماكسيمۇلى ەنگىزگەن جاڭاشىلدىقپەن ساحنالاعان م.اۋەزوۆتىڭ «قاراكوز»، ا.چەحوۆتىڭ «شاعالا»، ج.پرەسگيۋۆنيكتىڭ «رومەو-دجۋلەتتا» تۋىندىلارى ۇسىنىلدى. اتالعان ۇزىندىلەردە نارشا مەن رومەو بەينەسىندە كورىنگەن اراپوۆ ابزالدىڭ ويىنى ەسىمە ساقتالىپتى. ابزالدىڭ سول كەزدەگى نارشاسى قاراكوزدى شىن سۇيەتىن، سۇيە تۇرا وعان قول تيگىزبەي ادالدىعىن ساقتاعان كەيىپكەر بولدى. ابزال-كوكشەتاۋ ءوڭىرىنىڭ تۋماسى. استانا قالاسى اكىمدىگىنىڭ مۋزىكالىق جاس كورەرمەندەر تەاترىنىڭ قۇرىلعان كۇنىنەن باستاپ قىزمەت ەتىپ كەلەدى. ءار جانرداعى كەيىپكەرلەرىمەن كورەرمەن قوشەمەتىنە بولەنىپ ءجۇر.
اباي بەينەسىن جاساۋ كەز-كەلگەن اكتەردىڭ باسىنا قونا بەرمەيتىن باق. بىراق، بۇل باق اراپوۆ ابزالدىڭ باعىنا قونعانىن جاقسى بىلەمىز. ابزال ە.امانشاەۆتىڭ «شاكارىم» مۋزىكالىق دراماسىنا اباي ءرولىن وينادى. ابزالدىڭ ابايى-كەلەشەككە ۇمىتپەن قارايتىن، ەل ەرتەڭىنە سەنىممەن ۇلەس قوسۋدى قالايتىن اباي بولدى.
بۇل اكتەردىڭ ءرول جاساۋداعى ەرەكشەلەگى ەدى. م.وماروۆانىڭ ء«شامشى» ميۋزيكلى تەاتر سۇيەر قاۋىمنىڭ سۇيىكتى قويىلىمارىنىڭ بىرىنە اينالدى. بۇل ميۋزيكلىدە ابزال احمەت جۇبانوۆ بەينەسىن كەسكىندەيدى. ابزال-احمەت جۇبانوۆ-جاس ءشامشى قالداياقوۆ ءۇشىن رۋحاني ۇستاز، ونەردەگى جول كورسەتۋشى رەتىندە كورىنەدى. ول ءشامشىنىڭ تالانتىن تانىپ، وعان سەنىم ارتادى.ابزال-احمەت جۇبانوۆ بەينەسى ميۋزيكلدە تەك تاريحي تۇلعا ەمەس، ۇلتتىق ونەردىڭ بيىك يدەالىن، ۇستازدىق ءداستۇردى جانە شىعارماشىلىق جاۋاپكەرشىلىكتى بىلدىرەتىن تەرەڭ وبراز. ابزال-احمەت جۇبانوۆ ءشامشى قالداياقوۆتىڭ قالىپتاسۋىنا اسەر ەتكەن ماڭىزدى تۇلعا رەتىندە اشىلادى.
ك.ستانيسلاۆسكيدىڭ: «كىشكەنتاي ءرول بولمايدى، كىشكەنتاي اكتەر بولادى»-دەيتىن قاناتتى ءسوزى بار. ابزال ساحنا الاڭىنا قاي رولدە كورىنسە دە، كورەرمەننىڭ ەسىندە ساقتالىپ قالادى. سوزىمىزگە، «گاۋحارتاس» مۋزىكالىق دراماسىنداعى قابەن اقساقال بەينەسى دايەك بولا الادى. ابزالدىڭ ورىنداۋىنداعى قابەن-بويىندا دانالىعى، پاراساتتىلىعى باسىم اقساقال.
ا.ءۆولوديننىڭ «قوشتاسقىم كەلمەيدى» مۋزىكالىق دراماسىندا ابزال-نيكۋللين بەينەسىن جاسايدى. ابزال بەينەلەۋىندەگى نيكۋللين – سىرتتاي قاراعاندا كوپتىڭ ءبىرى، ەرەكشە كوزگە تۇسە بەرمەيتىن ادام. بىراق ونىڭ ىشكى جان دۇنيەسى تەرەڭ، ومىرگە دەگەن كوزقاراسى قايشىلىققا تولى. نيكۋللين – شىنايى سەزىمدى اڭسايتىن ادام. ول ماحاببات ارقىلى ءومىرىنىڭ ءمانىن تابۋعا تىرىسادى. بىراق ونىڭ سەزىمدەرى ءاردايىم جاۋاپ تابا بەرمەيدى، بۇل ونىڭ ىشكى دراماسىن كۇشەيتەدى. ابزال-نيكۋللين ايەلىن قانشا جەردەن سۇيمەيمىن دەپ، بەزىنسە دە، ونىڭ جانارىنان قيماستىق، ىشكى اياۋشىلىق سەزىمدى بايقايمىز.
ابزال وسى ارقىلى نيكۋللينىڭ دە، جان-دۇنيەسىندە مەيرىمدىلىك جاتقانىن اڭعارتادى. كورنەكتى تەاتر سىنشىسى، قر ەڭبەك سىڭىرگەن قايراتكەرى، پروفەسسور ءا.سىعاي: «تالانت – جاراتىلىستان سۇيەكسىڭدى قاسيەت. جاس تالاپكەر بويىنداعى بار تالانتىن ەڭبەك قورلىقپەن جالعاستىرا السا عانا ماقساتىنا جەتەدى»-دەگەن وسيەت ءسوزى بار. ابزال ەڭبەكقورلىعىمەن ماقساتقا جەتىپ جۇرگەنى رولدەرىنەن بايقالادى. زامانداسىمىزدىڭ كەيىپتەر بەينەلەرى ازايماسىن!
باحتيار تۇرسىن
تەاترتانۋشى
