وسىدان 8 جىلداي ۋاقىت بۇرىن جاس جىگىت ت.جۇرگەنوۆ اتىنداعى قازاق ۇلتتىق ونەر اكادەمياسىنا ەمتيحان تاپسىرىپ، اۆتوبۋسپەن اۋىلىنا جول تارتىپ بارا جاتتى. ءتۇن ءىشى بولاتىن. گرانت جاۋابى جونىندە تەلەفونىنا حابارلاما كەلىپ، اتالمىش جىگىت حابارداعى تىزىمنەن ءوز اتى-ءجونىن كورگەندە قۋانعانان ايعايلاپ جىبەردى.
اۆتوبۋستاعى ۇيىقتاپ جاتقان وزگە جولاۋشىلار شوشىپ كەتىپ نە بولعانىن سۇرايدى. ال بوزبالا بولسا، ءوزىنىڭ ت.جۇرگەنوۆ اتىنداعى قازاق ۇلتتىق ونەر اكادەمياسىنا «مۋزىكالىق تەاتر ءارتىسى» ماماندىعىنا گرانتقا تۇسكەنىن قۋانا ايتادى. اۆتوبۋستاعى ساپارلاستار بولاشاق اكتەردىڭ العاشقى قادامىنا قۇتتى بولسىن ايتىپ، كورىمدىكتەرىن بەرىپ، اق باتالارىن جاۋدىردى. قۋانىشىن ساپارلاستارىمەن بولىسكەن بۇل جىگىتتىڭ اتى-ءجونى سۇندەتحان دۇيسەحان.
قازىرگى كەزدە استانا قالاسى اكىمدىگىنىڭ مۋزىكالىق جاس كورەرمەندەر تەاترىنىڭ اكتەرى. تەاتر ساحناسىنداعى تۇڭعىش ءرولى م.اۋەزوۆتىڭ «اباي-توعجان» دراماسىنداعى اققوزى بەينەسى بولاتىن. سۇندەتحان دۇيسەحان سومداعان اققوزى بەينەسى – «اباي–توعجان» دراماسىنداعى كۇردەلى ءارى الەۋمەتتىك ماعىناسى تەرەڭ كەيىپكەرلەردىڭ ءبىرى. اققوزى – جەكە ادام عانا ەمەس، بۇكىل قوعامنىڭ قىسىمىن الىپ جۇرگەن بەينە. ونىڭ مىنەزىندەگى قاتالدىق – جەكە قاسيەتتەن گورى، زامان تالابىنان تۋعان مىنەز. اققوزى بەينەسى – ماحاببات تراگەدياسىنىڭ قارسى بەتى. ول – اباي مەن توعجاننىڭ سەزىمىنە قارسى تۇرعان كۇش قانا ەمەس، ءداۋىردىڭ قاتال زاڭىنىڭ كوركەم بەينەسى. سۇندەتحان دۇيسەحان بۇل كەيىپكەردى نانىمدى، پسيحولوگيالىق تەرەڭدىكپەن جەتكىزە وتىرىپ، كورەرمەنگە وي سالاتىن وبراز جاسايدى.
اققوزىنى سۇندەتحان وسىلاي ەرەكشەلەندىرەدى. م.وماروۆانىڭ ء«شامشى» ميۋزيكلىندەگى جاراس بەينەسى ەپيزودتتىق ءرول بولسا دا، كورەرمەن ەسىندە ساقتالاتىن كەيىپكەر. جاراس-قىزعانشاق، اشۋعا تەز بەرىلگىش جان. بىراق، سۇندەتحان-جاراستى ساحنا الاڭىندا اقتاي بىلەدى. ول ءشامشىنىڭ ميليتسيادان قۇتقارعانىنا العىسىن ءبىلدىرىپ، كەشىرىم سۇرايدى. ياعني، اكتەر سۇندەتحان جاراستان ناعىز ەر جىگىتكە ءتان بولمىستى اشا الدى.
ا.ءۆولوديننىڭ «قوشتاسقىم كەلمەيدى» دراماسىنداعى سۇندەتحان نۇسقالايتىن ۆالەرا تۋىندىداعى ماسەلە تۋدىرۋشى، قوزعاۋشى بەينە. ۆالەرا – سىرتتاي قاراعاندا قاراپايىم فوتوگراف. بىراق ونىڭ ماماندىعى سيمۆوليكالىق مانگە يە، ول ءساتتى «توقتاتىپ»، ۋاقىتتى ۇستاپ قالۋعا تىرىساتىن ادام. ال شىن ومىردە ول كەرىسىنشە – ۋاقىتتىڭ، سەزىمدەردىڭ ءوتىپ بارا جاتقانىن توقتاتا المايتىن تۇلعا. كەيىپكەر كوپ جاعدايدا سىرتتاي اشىق كورىنگەنىمەن، ىشىندە تەرەڭ جالعىزدىق جاتىر. ول ءوزىن تولىق تۇسىنەتىن ادامدى تابا المايدى.
بۇل – درامانىڭ نەگىزگى ەموتسيونالدىق وزەكتەرىنىڭ ءبىرى. ۆالەرا – بۇل جاي عانا فوتوگراف ەمەس، ول ۋاقىتپەن، سەزىممەن، وتكەنمەن كۇرەسەتىن ادام بەينەسى. سۇندەتحان دۇيسەحان ونى شىنايى، اسەرلى ەتىپ جەتكىزىپ، كورەرمەنگە ءومىردىڭ وتكىنشىلىگى مەن سەزىمنىڭ باعاسىن تەرەڭ سەزىندىرەدى.
سۇندەتحان دۇيسەحان – ساحنادا وزىندىك قولتاڭباسى بار، پسيحولوگيالىق دالدىككە سۇيەنەتىن اكتەرلەردىڭ ءبىرى. ونىڭ ويىنى سىرتقى ەففەكتىدەن گورى ىشكى شىندىققا، تابيعيلىققا نەگىزدەلەدى. انتون چەحوۆ:«ونەردە ەڭ باستىسى – شىنايىلىق پەن قاراپايىمدىلىق»،-دەيدى.
سۇندەتحان شىنايىلىق قاراپايىمدىلىقتى بويىنا سىڭىرە ءبىلدى. سۇندەتحان-ارقاشان ساحناعا شىعاردا ءبىرىنشى جانە سوڭعى رەت شىعاتىنداي بارىن سالىپ، ءار رولىنە ۇلكەن تىڭعىلىقپەن قارايدى. وسىدان 8 جىل اۆتوبۋس ىشىندە وتىرىپ، سۇندەتحاننىڭ ونەر جولىنا اق تىلەۋىن بىلدىرگەن جولاۋشىلار بۇگىندە ونىڭ تەاترداعى قويىلىمدارىن تاماشالاپ جۇرگەن بولار....
باحتيار تۇرسىن
تەاترتانۋشى
