بوتەننىڭ مۇلكىن جىمقىردى دەگەن ايىپپەن قاماۋعا الىنعان كاسىپكەر، لينگۆيست مامان ازات كارىم تۇرمەدەن حات جولداعان. كاسىپكەر ءوز حاتىندا قىتايلىق كومپانيامەن سەرىكتەس بولىپ، ارتىنشا الدانىپ قالعانىن ايتادى، دەپ حابارلايدى "ادىرنا" ۇلتتىق پورتالى.
سونداي-اق ول وزىنە جالعان جالا جابىلىپ، تۇرمەدە جازىقسىز وتىرعانىن دا جازادى. بۇل تۋرالى اقىن توقتارالى تاڭجارىق ءوز Facebook پاراقشاسىندا جاريالادى.
تۇرمەدەن حات
ءبارى 2014 جىلدىڭ سوڭىندا سەرىك كەنەنبايدىڭ قازاقستاندا بيزنەس ىستەگىسى كەلەدى دەپ Jing Honglin, Miao Jianling, Liu Jun, Tang Qing اتتى قىتاي ازاماتتارىمەن تانىستىرۋدان باستالدى.
اتالعان شەتەلدىك ازاماتتار مەنىڭ فيرمامنىڭ قۇرىلىس زاتتارىمەن اينالىساتىنىن، قولىمدا تەحنيكالارىم بار، جاعدايىمنىڭ جاقسى ەكەنىنە كوز جەتكىزگەن سوڭ استانادان بىرلەسىپ گازوبلوك زاۋىتىن سالۋدى ۇسىندى. قىتاي تاراپى 90%، قازاقستان تاراپى 10% ۇلەسىن بىرلەسىپ ىستەيمىز دەپ ۋاعدالاستىق. ينۆەستيتسيانى قحر-دان العاننان سوڭ قازاقستانداعى جۇمىستاردى باستادىق.
26.05.2015 ج. استانادا «Rongshun Astana Building Materials CO.LTD» اتتى فيرمانى بوگەنباي داڭعىلى، 28-ءۇي مەكەنجايىنداعى مەنىڭ وفيسىمە تىركەدىك. وسى رەتتە ەرەكشە ەسكەرتە كەتەتىن ءجايت: فيرما قۇرعاندا وزگە قىتايلىق ازاماتتار استانادا بولماعاندىقتان، ولاردىڭ سەنىمدى وكىلى رەتىندە، كەيىن قايتارىپ بەرەتىن بولىپ، قىتاي تاراپىنا ءتيىستى 90% ۇلەس ليۋ جۋنگە (Liu Jun) جازىلدى. جاڭا فيرما قۇرماس بۇرىن قىتايلىق سەرىكتەستەرمەن بىرلەسىپ زاۋىت سالاتىن جەر ىزدەپ، «تاراز جول قۇرىلىسى» جشس-نىڭ №101 كوشەدەگى ەسكى ءوندىرىس بازاسىن بارلىق جاعىنان قولايلى دەپ ساتىپ الىپ، ونى «كاحان سەرۆيس» جشس-نىڭ بالانسىنا تىركەگەن بولاتىنبىز. بۇل تىركەۋدى استانا قالاسى اكىمدىگىنىڭ جەر باسقارماسىندا قايتادان تىركەتكەنبىز.
27.05.2015ج. «Nantong Rongshun Building Materials.CO,LTD» «Rongshun Astana Building Materials CO.LTD» جانە «كاحان سەرۆيس» جشس اراسىندا №1/05-15 كەلىسىمشارتى جاسالىپ زاۋىت سالۋ جۇمىستارى رەسمي باستالدى.
قىتايلىق كاسىپكەرلەرمەن جۇمىس ىستەگەندەر بىلەدى، ولاردىڭ كوبى جۇمىستى بارىنشا تەز ىستەيدى، قارجىنى بارىنشا ۇنەمدەۋگە تىرىسادى. مەنىڭ قىتايلىق سەرىكتەستەرىم دە سونداي بولدى. ءتورت قىتايلىق سەرىكتەسىم استانادا الماكەزەك تۇرىپ، ءاربىر تيىندى قاداعالاپ قانا قويماي، قۇرىلىس جۇمىستارىن تەزدەتۋدى قۋزاپ وتىردى. ءبىز ءوز تاراپىمىزدان قۇرىلىس، قۇجات، سالىق، قارجى جانە وزگە دە ۇيىمداستىرۋ جۇمىستارىن بارىنشا جىلدامداتىپ شەشىپ وتىردىق. شىن مانىندە جۇمىستىڭ بارلىق اۋىرلىعى بىزگە ءتۇستى. باسىندا $22.050.000 (اقش دوللارى) قارجى سالامىز دەپ ينۆەستيتسيالىق ليتسەنزيا العان قىتاي تاراپى 06.2015-08.2017 جج. كەزەڭىندە زاۋىت سالىنىپ بولعانشا 429.282.063,36 تگ. عانا جىبەردى. سوندىقتان قۇرىلىسقا قاجەتتى قارجى جەتىسپەي قيىندىقتار تۋىندادى. قوسالقى مەردىگەرلەرگە قارىز بولدىق. ءوزىمىزدىڭ تەحنيكالارىمىزدىڭ جۇمىس اقىلارىن ءتىپتى ەسەپتەمەدىك (مەنىڭ ەكى جۇك ارتاتىن تەحنيكام (پوگرۋزچيگىم) قازىرگە دەيىن ليۋ جۋن يەلىگىندەگى زاۋىتتا جۇمىس ىستەپ ءجۇر، ونىمەن ەسەپتەسۋ كەرەك ەكەنىن ۇمىتىپ كەتكەن سەكىلدى). قارجى جەتپەگەندىكتەن دوستارىم مەن تۋىستارىمنان قارىز دا الدىم، ءتىپتى كرەديت رەسىمدەۋ ءۇشىن ءوز باسىمداعى پاتەرىمدى بانككە كەپىلگە قويدىم (فورتە بانكتەگى ول كرەديتتى ءالى كۇنگە دەيىن تولەپ كەلەمىن). مەنىڭ بار ويىم زاۋىتتى تەزىرەك وندىرىسكە قوسۋ بولدى. قۇرىلىسقا قاجەتتتى قارجى جەتىسپەگەندىكتەن ارامىزدا ءتۇرلى كەلىسپەۋشىلىەتەر دە ورىن الدى. اسىرەسە ا. ورازباەۆ ولارعا «كەلىسىمشارتتى ورىنداماي جاتىرسىڭدار» دەپ ۇنەمى ەسكەرتۋمەن بولدى. قىتايلىق سەرىكتەستەرىم وسىدان باستاپ ىشىنە كەك ساقتادى دەپ ويلايمىن. تىرىسىپ-تىرمىسىپ ىستەپ 2017ج. كۇزگە قاراي زاۋىتتى وندىرىسكە قوستىق.
ماسەلەنىڭ ۇلكەنى وسى كەزدە باستالدى. ليۋ جۋن قاجىمقان ءماسىموۆتى (كارىم ءماسىموۆتىڭ مارقۋم اكەسى) «جاڭا سەرىكتەسىمىز كومەكتەسەدى» دەپ الىپ كەلدى. ولار «كومەكتەسىپ قارجى سالامىز، وندىرىستەرىڭدى كەڭەيتەمىز، بىراق بىزگە كەپىلدىككە «كاحان سەرۆيس» جشس-نىڭ 51% ۇلەسىن جازىپ بەرۋلەرىڭ كەرەك» دەپ شارت قويدى. قانشا قارسى بولساق تا، ليۋ جۋن جابىسىپ تۇرعاندىقتان، ۇكىمەت باسىنداعى ىقپالدى ادامنىڭ اكەسىنىڭ ايتقانىنان اسا المادىق. قورقىتىپ-ۇركىتىپ، الداپ-ارباۋمەن 51% ۇلەستى جازىپ العان سوڭ سىرتىمىزدان جالعان قۇجاتتار جاساپ، «كاحان سەرۆيس» كومپانياسىنا تيەسىلى جەردى قىتاي تاراپىنا تولىق وتكىزىپ جىبەردى. ليۋ جۋن مەن ولاردىڭ اراسىندا قانداي قۇپيا كەلىسىم بولعانىن بىلمەيمىن، بىراق ليۋ جۋن سودان باستاپ قالعان قىتايلىق ۇلەسكەرلەردى دە، مەنى دە الداي باستادى. نوتاريالدى تۇردە قايتارىپ بەرگەن «Rongshun Astana Building Materials Co.LTD» فيرماسىنىڭ اۋەلدەن ماعان تيەسىلى 10% ۇلەسىن تىركەۋدەن وتكىزۋگە اسىقپادى. ق.ءماسيموۆتىڭ كومەكشىسى ساپارگۇل جاباعايلىقىزى تىركەپ بەرەمىن دەپ ۋادە بەرىپ ەدى، ول دا سوزىندە تۇرمادى. وسى تۋرالى تەرگەۋشى ا.ك.يبراەۆقا بەتتەستىرۋ جاسا دەپ تالاپ قويىپ ەدىك، ول دا ورىندالعان جوق. بۇل ادىلەتسىزدىككە توزە الماي، 2017 جىلدىڭ سوڭىندا سوتقا جۇگىنە باستادىق، العاشىندا مەن «جابىرلەنۋشى»، ال ليۋ جۋن «جاۋاپكەر» رەتىندە سوتتاسىپ جۇردىك. كوپتەگەن سوت وتىرىستارى ءوتتى. اۋەلىدەن «زاۋىتتى كىم سالدى؟ قانداي اقشاعا سالىندى؟ ءوندىرىس ىسكە قوسىلعاننان سوڭ پايداسىن كىم كورىپ وتىر؟» دەگەن سۇراقتاردىڭ ءمان-جايىنا قانىققان سوڭ سوت اياقتالار، مۇددەلەر ءبولىنىسى انىقتالىپ، ءبارى ورنىنا كەلەر» دەپ ويلادىم. الايدا مەنىڭ ويلاعانىمداي بولمادى. اركىم ءوز مۇددەسىن كوزدەپ جان-جاققا تارتقىلاي باستادى. ماڭايىمداعىلاردىڭ اباي ايتاتىن “دارۋل حاراپ” ەكەنىن ءبىلدىم. سوندا دا ادىلەتكە دەگەن سەنىمىمدى جوعالتپاي، قىتايلىق سەرىكتەستەن ۇلەسىمدى، ەسەمدى قالاي دا قايتارىپ الامىن دەپ ءجۇردىم. وكىنىشتىسى ءتۇرلى كەلەڭسىزدىكتەر، سوراقىلىقتار كوبەيە بەردى…. سونىڭ ءبىرى - 2023ج. 20 ساۋىردە قىتايدان ءىسساپاردان قايتىپ «قورعاس» كەدەن بەكەتىنەن كىرگەندە تۇتقىندالعانىم. 1 ساۋىردە استانادان بەيجىڭگە ۇشاردىڭ الدىندا تەرگەۋشى ا.ك. يبراەۆقا قىتايعا ىسساپارمەن باراتىنىمدى، ونداعى قىتايلىق ۇلەسكەرلەرمەن كەزدەسەتىنىمدى ايتقان بولاتىنمىن. ءوزى «بارا بەر» دەگەن بولاتىن. ەندى ويلاسام، قورعاستان قايتپاي استاناعا ۇشىپ كەلگەنىمدە 30 قاراشا ەمەس، سول 20 ءساۋىر تۇرمەگە قامالار ما ەدىم؟!
قانشا سوراقىلىق، زاڭسىزدىقتار بولسا دا تەرگەۋشىلەردىڭ ادىلەتتىككە كوزدەرى جەتپەي ءجۇر عوي دەپ ويلاپ، بارلىق شىنىمدى ايتىپ، ۋاقىت ءبولىپ بارىپ ءجۇردىم. كەيدە ورىس تىلىندە جازعاندارىن جەتە تۇسىنبەسەم دە ەش قاستىعى بولماس دەپ قول قويىپ بەرە بەردىم. تۋرا سونداي ءبىر شاقىرتۋدى 30 قاراشادا ساع. 20:00 بەلگىلەدى. قاپەرىمدە تۇك جوق، ايتىلعان ۋاقىتتا زاۋىتقا قاتىستى قۇجاتتاردى الىپ باردىم، بىراق بۇل جولى تەرگەۋشى ا.ك. يبراەۆ پەن د.قۇنانباەۆ وزدەرىنىڭ جازعان قاۋلىسىن كورسەتىپ «كۇدىكتى-ايىپتالۋشى رەتىندە تۇتقىندالدىڭ! قول قوي!»، -دەدى. مەن اڭ-تاڭ بولدىم. جاقىندارىما حابارلاسىپ تۇتقىندالعانىمدى ايتايىن، جۇمىستارىمدى ورنالاستىرايىن دەگەنىمە كونبەي سۋمكامدى (پورتفەل), ەكى تەلەفونىمدى، جەكە كۋالىگىمدى، بانك كارتالارىم مەن ءاميانىمدى تاركىلەپ، قولىما كىسەن سالدى دا الدى-ارتىما قاراتپاي ۋاقىتشا ۇستاۋ يزولياتورىنا (تۇرمەگە) توعىتتى. سودان بەرى كونستيتۋتسيالىق بوستاندىعىم شەكتەلىپ، ار-وجدانىم تاپتالىپ، قورلىق كورىپ كەلەمىن.
ادۆوكات العاشىندا 48 ساعات ىشىندە بوساتادى دەپ ەدى، ولاي بولمادى. استانا قالاسى مامانداندىرىلعان اۋدانارالىق سوتتىڭ سۋدياسى ا.ي.يساەۆا «قولىمدا ماعان قاراپ وتىرعان ەر جەتپەگەن 4 بالام، قارت انام بار، ءسوزسىز اياقتاۋعا ءتيىستى جۇمىستارىم بار، پاتەرىم بار، كەرەك بولسا كەپىلدىككە قوياتىن مۇلكىم دە بار، وتانشىل جۇرەگىم بار. مەنى ۇيقاماققا شىعارىڭىز» دەگەن وتىنىشىمە قۇلاق اسپادى. تەرگەۋشى ا.ك.يبراەۆتىڭ «شەتەلگە قاشىپ كەتۋى مۇمكىن. تەرگەۋگە كەدەرگى كەلتىرۋى مۇمكىن» دەگەن ۋاجىمەن ەكى ايعا تۇرمەگە وتىرعىزۋعا شەشىم شىعاردى.
2017 جىلدان بەرى سوتتاسىپ جۇرسەم قايدا قاشامىن؟ ەلىم-جەرىم دەپ قىتايدان كەلگەنىمە، قانداي جۇمىستار ىستەگەنىمە قاراماي ما؟ پوليتسياعا قانداي كەدەرگى جاساي الامىن؟ ابسۋرد. سوراقى شەشىم نە ءۇشىن جاسالدى؟
تۇرمەدەگى ار-وجدان تاپتالۋىن، قورلىقتى ايتپاي-اق قويايىن! بىراق، مەن سەكىلدى العاش ەكى ايمەن كىرىپ، جىلداپ تەرگەلىپ، ءالى سوتقا جەتە الماي جۇرگەندەردىڭ مىناداي سوزدەرىنىڭ ماعان وتە اۋىر وي سالعانىن ايتپاۋىما بولمايدى. «مۇندا كىردىڭ بە، ەندى شىعارماۋعا تىرىسادى. قىلمىسىڭ بولماسا دا قاشان «جاڭا قىلمىس» تاپقانشا تۇرمەدە وتىرۋىڭدى ءبىر اي، ەكى ايدان ۇزارتا بەرەدى.» ولار «ادام بولسا قىلمىس تابىلادى» دەگەن قاساڭ پرينتسيپكە سەنەدى. قازىر ولارعا ستاتيستيكا كەرەك، شەندەرىن ءوسىرۋ كەرەك…. سەنىڭ «قىلمىستىق قۇرامى جوق» دەپ جابىلىپ قالعان ءىسىڭنىڭ قايتا-قايتا قولعا الا بەرگەنىنىڭ سىرى وسى. ساعان جالا جابۋشى ليۋ جۋن دەگەن قىتاي وزگە قىتايلاردىڭ اقشاسىن دا يەلەنىپ كەتسە، ونىڭ ۇستىنە 6 جىلدان بەرى گازوبلوك ءونىمىنىڭ پايداسىن ءبىر ءوزى كورىپ، قوماقتى اقشاسى بولسا، جاعدايىڭ ءتىپتى قيىن بولادى»
ايتقانداي-اق سوت گ. يبراشەۆا 2024 جىلى 25 قاڭتاردا تۇرمەدە ۇستاۋ مەرزىمىن ءبىر ايعا، ال 21 اقپاندا تاعى ءبىر ايعا سوزا سالدى. «مىنا جەردە مەن ەشكىمگە كەرەكسىزبىن، ەكى ايدا ءبىر دە ءبىر تەرگەۋشى كەلگەن جوق. ۇكىمەتتىڭ بيۋدجەتىن ورىنسىز شىعىنداماي مەنى ۇيگە شىعارىڭدار، وندا بالالارىم، قارت اناما كەرەكپىن. شىعىنعا كەتىپ جاتقان جۇمىستارىم بار، ەرتەڭ بالا-شاعامدى كىم باعادى؟ جۇمىسكەرلەرىمە ەڭبەكاقىنى كىم تاراتادى؟» دەگەن ۋاجىمە دە، ادۆوكاتتىڭ مەنى تۇتقىنداۋدىڭ ءوزى مۇلدە زاڭسىز ەكەنىن دالەلدەگەنىنە دە قارامادى. سودان اۋىر ويعا (شومدىم) باتتىم.
2017 جىلدان باستالعان سوتتاسۋلاردى ەسىمە الدىم. قالاي «جابىرلەنۋشىدەن» «كۇدىكتىگە»، «كۇدىكتىدەن» «ايىپتالۋشىعا» اينالعانىمدى، قالاي تۇرمەگە تۇسكەنىمدى ويلادىم. جالاقورلاردىڭ ەندى مەنەن «قىلمىسكەر» جاساپ، مۇلكىمدى تاركىلەپ، ءوزىمدى لاگەرگە جىبەرۋ نيەتتەرى بار ەكەنىنە ەش كۇمانىم قالمادى.
بەيجىڭدە ۋنيۆەرسيتەت ءتامامداپ، قىتاي ورتالىق راديوستانتسياسىندا جۇمىس ىستەگەن، ودان ەلىم-جەرىم دەپ وتانشىلدىقپەن قازاقستانعا ورالعان زيالى رەتىندە، قازىرگە دەيىنگى ءومىر جولىمدا ەشكىمنىڭ الا ءجىبىن اتتاماعان، بار جەتىستىككە ءوز ەڭبەكقورلىعىمنىڭ ارقاسىندا جەتكەن بيزنەسمەن رەتىندە، ءبىر الاياق قىتايلىق ازاماتتىڭ جالاسىنىڭ، مەرەز جەمقورلىقتىڭ، ناۋقانشىل ستاتيستيكانىڭ شىنىمەن قۇربانى بولىپ كەتەمىن بە؟ ويلانا كەلە بارلىعىن كوپكە اشىق ايتۋدى شەشتىم. كوپتىڭ ءبىر اتى - قۇداي. ادىلەت سىزدەردەن كەلەر. كومەك كۇتەمىن.
(1) استانا قالاسىنىڭ بايقونىر اۋدانى پب تەرگەۋشىسى ا.ك. يبراەۆتىڭ الاياق، جالاقور ليۋ ءجۋننىڭ ارىزىن قابىلداپ تىركەۋىنىڭ ءوزى زاڭسىز. سەبەبى: قىتايدىڭ «Nantong Shuntu International Trade Co.LTD» كومپانياسى ارقىلى قازاقستانعا جيىنى 429282063,36 تەڭگە ينۆەست سوما كىردى. ول كومپانيانىڭ يەسى - Jing Hongling. ونىڭ ءوزى ليۋ جۋن الداپ كەتتى دەپ سوتتاسىپ ءجۇر. سوندا مەن قالاي ليۋ ءجۋننىڭ 440.041.750 تەڭگە اقشاسىن جىمقىرعان بولامىن؟ كەرىسىنشە ليۋ ءجۋننىڭ ءوزى وزگەلەردىڭ اقشاسىنا سالىنعان زاۋىتتى يەلەنىپ سەرىكتەستەرىن سان سوقتىرعان، ولارعا جالا جاپقان كۇدىكتى قىلمىسكەر بولىپ شىقپاي ما؟
(2) «كاحان سەرۆيس» جشس اتىنان سالىنعان گازوبلوك زاۋىتىن 29.12.2017 ج. مەملەكەتتىك رەەستەردەن وتكىزىپ (رەەستر №2412پ) تىركەگەندە قۇرىلىس-مونتاج جۇمىستارىنا 411.589.967,96 تەڭگە جۇمسالدى دەپ جازىلعان. سول كەزدە ءبارى تەكسەرىلگەن. مارقۇم قاجىمقان ءماسىموۆتىڭ ادامدارى دا بولعان. باعالاپ-ەسەپتەۋ (وتسەنكا) فيرماسى بازار باعاسى 1.117.593.796 تەڭگە تۇرادى دەپ انىقتاما بەرگەن، ول دا بار. وسى زاۋىتتى الاياق ليۋ جۋن 2017 جىلدان بەرى يەلەنىپ، وندىرگەن گازوبلوكتى ساتىپ پايداسىن كورىپ كەلەدى. سوندا قالاي مەن 189-باپ بويىنشا بوتەننىڭ مۇلكىن جىمقىرعان بولىپ ايىپتالۋعا ءتيىسپىن؟ پارادوكس!!
(3) سەرىكتەستىك باستالعان كۇننەن باستاپ قىتايلىق ۇلەسكەرلەردىڭ بىرەۋى بولماسا، بىرەۋى ۇنەمى استانادا، جانىمىزدا ءجۇردى. ءاربىر تيىننىڭ شەشىمىنە ارالاسىپ وتىردى. سوندا بىزگە قانداي اقشانى سەنىپ تاپسىرعان بولادى؟ ءبىز ءوز اقشامىزدى قوسقاننان باسقا ولاردىڭ قانداي اقشاسىن جىمقىرىپپىز؟ اۋەلى بىزگە سەنىپ كورىپ پە وزدەرى؟
30 قاراشادا تۇندە مەنى اسىعىس تۇتقىنداپ تۇرمەگە قاماۋدىڭ ەندى ءبىر سىرى بىلاي دەپ ويلايمىن: قالعان قىتايلىق ۇلەسكەرلەر 6 جەلتوقساندا استاناعا كەلەمىز دەپ ماعان قوڭىراۋ شالعان. ولار وسى جولى كەلگەندە ليۋ جۋننەن گازوبلوك زاۋىتىنداعى وزدەرىنە ءتيىستى ۇلەستەرىن جازدىرىپ الماقشى ەدى. ۇلەستەرىن بەرمەي بۇرىنعىداي ءتۇرلى سىلتاۋ ايتىپ الداۋسىراتسا، سوتقا بەرۋدى ۇيعارعان. ال ۇلەستەرىن جازدىرىپ بەرسە، تولىق اۋديت جاساپ 7 جىلدان بەرى گازوبلوك ساتۋدان تۇسكەن پايدانى سۇراماقشى بولعان. الاياق ليۋ جۋن ولاردىڭ مەنىمەن بىرلەسىپ كەتۋىنەن قورقىپ، مەنى قاماتىپ وتىر. سوندا مەنى قارالاپ، ولاردى الداپ ءتىل تابىسۋ وڭايىراق بولماق. مەنىڭ وسى بولجامىم راس بولسا، ءبىزدىڭ پوليتسەيلەر كىم ءۇشىن جۇمىس ىستەپ وتىر؟ وسى ارادان سىبايلاس جەمقورلىق كورىنىپ تۇرعان جوق پا؟ ءبىزدىڭ قۇقىق قورعاۋ سالاسىنداعىلار، ۇقق، ليۋ ءجۋننىڭ ماڭىنداعى ورالمانداردىڭ كىمگە قانشا پارا بەرگەنى تۋرالى ايتىپ جۇرگەن اقپارات نەگە تەكسەرىلمەيدى؟ ءوزى شوشقا بولا تۇرىپ وزگەنى يتكە بالاپ، سۇيەك-ساياقپەن الداماق بولعان، «بارلىعىن ساتىپ الامىن» دەپ اشىق ايتىپ جۇرگەن، قازاق قىزدارىن قولجاۋلىق ەتىپ، الەۋمەتتىك ورتانى ءبۇلدىرىپ جۇرگەن ليۋ ءجۋندى نەگە تەكسەرمەيدى؟ ءبىزدىڭ داۋىمىز سەبەپتى 2021 جىلدان بەرى جالپى قۇرىلىس-مونتاج ساراپتاماسىن جۇرگىزەمىن دەگەن تەرگەۋشى ا.ك. يبراەۆ نەگە ءالى ساراپتاماسىن جۇرگىزىپ بولمايدى؟ ءبىز ءوزىمىز ساراپتاما جۇرگىزەيىك دەسەك، «قىتاي زاۋىتقا كىرگىزبەيدى» دەپ الاياق ليۋ ءجۋننىڭ الدىنا نەگە دارمەنسىزدىك تانىتىپ بەيشارا بولادى؟ كەرىسىنشە مەنى قارالاعان 02.12.2023 ج. سوراقى قاۋلىسىندا قىتايلىق سەرىكتەستەرمەن جۇمىس باستاعان 2015 جىلى «اقشا جىمقىرۋ جوسپارىن جاساعان» دەپ قالاي عانا قۇدايدان قورىقپاي، پەندەدەن ۇيالماي جالا جابادى؟ ەكى جىلدان استام ۋاقىت جۇمساپ، قارىزعا بەلشەدەن باتىپ ءجۇرىپ زاۋىت سالعانىمىزدى، ول زاۋىتقا ليۋ ءجۋننىڭ يە بولىپ، پايداسىن كورىپ وتىرعانىن بىلە تۇرا، بانك شوتىنان وتكەن بارلىق اقشانى «جەپ قويدى» دەگەن سوراقى جالانى قالاي وڭاي جابا سالادى؟
ءيتتىڭ يەسى بولسا، ءبورىنىڭ ءتاڭىرى بار دەيدى. ليۋ ءجۋننىڭ يەسى كىم ەكەنى بەلگىلى. مەنىڭ ءتاڭىرىم - كوپ. كوپتىڭ ءبىر اتى-قۇداي! كوپتەن كومەك، اراشا ادىلەت سۇراپ وتىرمىن. ءبارىمىز-ءبىرىمىز ءۇشىن، ءبىرىمىز ءبارىمىز ءۇشىن، قۇقىعىمىز ءۇشىن، ادىلەت ءۇشىن كۇرەسپەسەك جاڭا، ادىلەتتى قازاقستان ەشقاشان بولمايدى. قازاقستانىمىز كەدەي، مادەنيەتسىز ەلگە اينالادى. ۇرپاعىمىز كەلىمسەكتەردىڭ قولىنا قارايتىن جالتاق، ءالجۋاز بولادى.
حاكىم اباي ايتقان «ءولىم باردا - قورلىق جوق». مەن زاڭسىز، ورىنسىز، ادىلەتسىز قورلىققا توزە المايمىن. ەركىن ومىردەگى تۋعان-تۋىس، دوس-جاراندارىم، قازاقستاننىڭ بولاشاعىنا بەي-جاي قاراي المايتىن، ادىلەتتى قازاقستان قۇرۋدى ءسوز جۇزىندە عانا ەمەس، شىنايى ومىردە كورگىسى كەلەتىن ءاربىر ازامات مەنى قولدايدى دەپ سەنەمىن.
الىپتىڭ كۇشى – حالىقتا،
حالىقتىڭ كۇشى – بىرلىكتە.
كارىم ازات
