الماتىدا ەل اراسىندا "قارا مايور" اتانعان بوريس كەرىمباەۆتى ەسكە الۋ ءتۋرنيرى ءوتىپ جاتىر، دەپ حابارلايدى "ادىرنا" ءتىلشىسى.
امبەباپ جەكپە-جەكتەن ۇيىمداستىرىلعان تۋرنير - اۋعان سوعىسى ارداگەرىنىڭ قۇرمەتىنە وتكىزىلىپ وتىرعان العاشقى جارىس.
اۋعان سوعىسىنىڭ ارداگەرى، ەل "قارا مايور" اتاپ كەتكەن وتستاۆكاداعى ايگىلى پولكوۆنيك بوريس توكەنۇلى كەرىمباەۆتى ەسكە الۋ ءتۋرنيرى الماتىداعى № 4 مامانداندىرىلعان بالالار مەن جاسوسپىرىمدەر سپورت مەكتەبىندە ءوتتى.
جاس سپورتشىلاردى قولداۋ ماقساتىندا ءىس-شاراعا اۋعان سوعىسىنىڭ ارداگەرلەرى، "قارا مايوردىڭ" ارىپتەستەرى، قوعام قايراتكەرلەرى جانە الەمدىك ارەنالاردا كوك تۋدى جەلبىرەتىپ جۇرگەن بەلگىلى سپورتشىلار قاتىستى.
كەڭەس اسكەرىنىڭ اۋعان جەرىنەن شىعارىلعانىنا 35 جىل جانە قازاقتىڭ "قارا مايورىن" ەسكە الۋ ءۇشىن ءوتىپ جاتقان سايىستىڭ اشىلۋ سالتاناتىندا قر امبەباپ جەكپە-جەك فەدەراتسياسىنىڭ پرەزيدەنتى، قازاقستان ارداگەرلەر قاۋىمداستىعىنىڭ توراعاسى، اقىن باقىتبەك سماعۇلوۆ قۇتتىقتاۋ ءسوز سويلەپ، باتىرلارعا ارناپ شىعارعان ولەڭىن وقىپ، جاس سپورتشىلارعا رۋح بەردى.
رەسمي سالتاناتقا قاتىسقان بىرقاتار سپورت شەبەرلەرى مەن ارداگەرلەر بوريس كەرىمباەۆ اتىنداعى "ار-نامىس" توسبەلگىسىمەن ماراپاتتالدى.
№ 4 مامانداندىرىلعان بالالار مەن جاسوسپىرىمدەر سپورت مەكتەبىنىڭ باسشىسى ايتالاپ قالابايۇلى ۇزدىك ونەر كورسەتكەن سپورتشىلاردىڭ ۇلتتىق قۇراما ساپىنا الىناتىنىن اتاپ ءوتتى.
- بۇگىن كەڭەس وداعى اسكەرىنىڭ اۋعانستاننان شىعارىلعان مەرزىمىنە 35 جىل تولۋىنا بايلانىستى امبەباپ سپورت تۇرىنەن رەسپۋبليكالىق جارىس ءوتىپ جاتىر. وسى جارىستىڭ نەگىزگى ماقساتى - جاس جەتكىنشەكتەردى، سپورتشىلاردى سالاۋاتتى ءومىر سالتىنا باۋلۋ، جاقسى ويىن كورسەتكەن سپورتشىلاردى ۇلتتىق قۇراما ساپىنا ىرىكتەۋ. ۋنيفايت - جەكپە-جەك سايىسىنان باسقا بىرنەشە كەزەڭدەردەن وتەدى. بالالارعا بۇل سايىس وتە قىزىقتى دەپ ويلايمىن، - دەدى ايتالاپ قورعامباەۆ.
جاسوسپىرىمدەر اراسىنداعى باسەكەگە 7 وڭىردەن 270-تەن اسا سپورتشى قاتىسىپ جاتىر. 10-18 جاس ارالىعىنداعى ورەندەر بىرنەشە كەدەرگىلەردەن ءوتىپ، بوز كىلەمدە مىقتىنى انىقتايدى. جارىس 2 كۇنگە جوسپارلانعان.
ال قاتارلاستارىنان وزىپ شىققان بالۋاندارعا اقشالاي، ارنايى سىيلىقتار تابىستالىپ، ماداقتامالار بەرىلەدى.
