Almatyda el arasynda "qara maıor" atanǵan Borıs Kerimbaevty eske alý týrnıri ótip jatyr, dep habarlaıdy "Adyrna" tilshisi.
Ámbebap jekpe-jekten uıymdastyrylǵan týrnır - Aýǵan soǵysy ardageriniń qurmetine ótkizilip otyrǵan alǵashqy jarys.
Aýǵan soǵysynyń ardageri, el "qara maıor" atap ketken otstavkadaǵy áıgili polkovnık Borıs Tókenuly Kerimbaevty eske alý týrnıri Almatydaǵy № 4 mamandandyrylǵan balalar men jasóspirimder sport mektebinde ótti.
Jas sportshylardy qoldaý maqsatynda is-sharaǵa aýǵan soǵysynyń ardagerleri, "Qara maıordyń" áriptesteri, qoǵam qaıratkerleri jáne álemdik arenalarda kók týdy jelbiretip júrgen belgili sportshylar qatysty.
Keńes áskeriniń Aýǵan jerinen shyǵarylǵanyna 35 jyl jáne qazaqtyń "qara maıoryn" eske alý úshin ótip jatqan saıystyń ashylý saltanatynda QR ámbebap jekpe-jek federaııasynyń prezıdenti, Qazaqstan ardagerler qaýymdastyǵynyń tóraǵasy, aqyn Baqytbek Smaǵulov quttyqtaý sóz sóılep, batyrlarǵa arnap shyǵarǵan óleńin oqyp, jas sportshylarǵa rýh berdi.
Resmı saltanatqa qatysqan birqatar sport sheberleri men ardagerler Borıs Kerimbaev atyndaǵy "Ar-namys" tósbelgisimen marapattaldy.
№ 4 mamandandyrylǵan balalar men jasóspirimder sport mektebiniń basshysy Aıtalap Qalabaıuly úzdik óner kórsetken sportshylardyń Ulttyq qurama sapyna alynatynyn atap ótti.
- Búgin Keńes odaǵy áskeriniń Aýǵanstannan shyǵarylǵan merzimine 35 jyl tolýyna baılanysty ámbebap sport túrinen respýblıkalyq jarys ótip jatyr. Osy jarystyń negizgi maqsaty - jas jetkinshekterdi, sportshylardy salaýatty ómir saltyna baýlý, jaqsy oıyn kórsetken sportshylardy Ulttyq qurama sapyna irikteý. Ýnıfaıt - jekpe-jek saıysynan basqa birneshe kezeńderden ótedi. Balalarǵa bul saıys óte qyzyqty dep oılaımyn, - dedi Aıtalap Qorǵambaev.
Jasóspirimder arasyndaǵy básekege 7 óńirden 270-ten asa sportshy qatysyp jatyr. 10-18 jas aralyǵyndaǵy órender birneshe kedergilerden ótip, boz kilemde myqtyny anyqtaıdy. Jarys 2 kúnge josparlanǵan.
Al qatarlastarynan ozyp shyqqan balýandarǵa aqshalaı, arnaıy syılyqtar tabystalyp, madaqtamalar beriledi.
