كەشە استانا قالاسىنىڭ مامانداندىرىلعان اۋدانارالىق تەرگەۋ سوتىندا ەكس-مينيستر ارىستانبەك مۇحامەديۇلىنا قاتىستى كەزەكتى سوت تىڭدالىمى ءوتتى. سوتتالۋشى وزىنە تاعىلعان بارلىق ايىپتاۋدى جوققا شىعاردى، دەپ حابارلايدى "ادىرنا" ۇلتتىق پورتالى Stan.kz اقپارات اگەنتتىگىنە سىلتەمە جاساپ.
ونىڭ ايتۋىنشا، كەيبىرەۋلەر “ديپلومات” قوناقۇيىندەگى استىرتىن جەمقورلىق ارەكەتتەرىن جاسىرۋ ءۇشىن وعان ادەيى جالا جاپقان كورىنەدى. وسى سەبەپتى بۇرىنعى مينيستر پروكۋروردىڭ ايىپتاۋىمەن مۇلدەم كەلىسپەيتىنىن جەتكىزدى.
“بۇلاردىڭ ءبارى مىنا “ديپلومات” ءىسىن باسقا ايىپتاۋلاردىڭ ىشىنە قوسىپ جىبەرۋ ءۇشىن ادەيى جاسالىپ وتىر. قاي كەزدە ءبىر ادامعا 8 ءىس قوزعاپ ەدى؟ ماعان عانا. بىراق ونىڭ ىشىندە ەشبىر فاكت راستالعان جوق، تەك ايتەۋىر ءبىر دەرەك شىعىپ قالا ما دەگەن ۇمىتپەن سوزىپ جاتىر. بىردە ءبىر قۇقىقبۇزۋشىلىق جوق”، – دەدى مۇحامەديۇلى جۋرناليستەرگە ايتقان سوزىندە.
ول وزىنە تاعىلعان ايىپتاۋلاردىڭ نەگىزسىز ەكەنىن العا تارتىپ، وزىنە قاتىستى تاعى ءىس قوزعالعان جاعدايدا دا قورىقپايتىنىن اتاپ ءوتتى.
“مۇحامەديۇلىنىڭ فيرماسىنا، وتباسى مۇشەلەرىنە وسىنشا اقشا تۇسكەن، وسىنداي ادام پارا بەردى نەمەسە زاڭ بۇزدى دەپ كورسەتسە، وندا مەن تاعىلعان ايىپپەن كەلىسەر ەم. ەگەر ەشبىر فاكت بولماسا قالاي كەلىسەم؟ وسى ىسكە بايلانىستى تاعى دا ءىس قوزعالۋى مۇمكىن، قوزعاي بەرسىن، مەن قورىقپايمىن. سەبەبى ەشقانداي فاكت جوق. 2 جىلدان بەرى وسى ءىستى باقىلاپ جۇرسىزدەر. سىزدەرگە قانداي دا ءبىر ناقتى دەرەكتى ۇسىندى ما”، - دەپ ەكس-مينيستر ءوزىنىڭ سەنىمدى ەكەنىن ءبىلدىردى.
سونداي-اق ايىپتالۋشى كامەراداعى جاعدايىنىڭ جاقسى ەكەنىن، كۇنىگە سپورتپەن شۇعىلداناتىنىن دا جاسىرمادى.
“كامەرادا كۇندە يوگامەن اينالىسام، كۇندە كىتاپ وقيمىز، سپورتپەن شۇعىلدانامىز. جاقىندا 24 كۇن اشتىق جاريالادىم. بىراق كەرەك قۇجاتىمدى الدىم. ماقساتىما جەتتىم، - دەدى مۇحامەديۇلى.
"ادىرنا" ۇلتتىق پورتالى
