بۇرىنعى مادەنيەت جانە سپورت ءمينيسترى، ۇلتتىق مۋزەيدىڭ ەكس-ديرەكتورى ارىستانبەك مۇحامەديۇلىنا «ديپلومات» قوناقۇيىن زاڭسىز يەمدەندى دەگەن ايىپ تاعىلدى. ءىس ەلوردانىڭ قىلمىستىق ىستەر جونىندەگى اۋدانارالىق سوتىندا قارالىپ جاتىر، دەپ حابارلايدى «ادىرنا» ءتىلشىسى.
ەكس-مينيسترگە قىلمىستىق كودەكستىڭ 24-بابى 3-بولىگى – 249-بابى 1-بولىگى (رەيدەرلىك ارەكەتكە وقتالۋ), 28-بابى 3-بولىگى – 250-بابى 1-بولىگى (وكىلەتىن تەرىس پايدالانۋ ارقىلى قىلمىستىق قۇقىق بۇزۋشىلىقتى ۇيىمداستىرۋ) بويىنشا ايىپتالىپ وتىر.
ايىپتاۋ قورىتىندىسى بويىنشا، 2019 جىلى «ديپلومات» قوناقۇيىنە يەلىك ەتىپ وتىرعان ك. ەسىمدى كاسىپكەر مۇحامەديۇلىنان ءوزىنىڭ قوناقۇيىندەگى ماسەلەلەردى شەشۋ ءۇشىن ماتەريالدىق كومەك سۇراعان. سوتتالۋشى وعان 2,5 ملرد تەڭگە بەرۋگە كەلىسكەن، بىراق مۇنداي كومەك ءۇشىن ول سەنىمدى تۇلعا ەنەسىنىڭ اتىنا بيزنەستىڭ 71%-ىن رەسىمدەۋدى تالاپ ەتكەن. وسىلايشا ەكس-مينيستر قوناقۇيدى تولىق يەمدەنىپ الماق بولعان.
كەلىسىمگە قول قويىلعان سوڭ مۇحامەديۇلى قوناقۇيگە ءجيى كەلەتىن بولعان. كەيىن ول قوناقۇيدىڭ قالعان 29% بولىگىن بەرۋدى سۇراعان. الايدا كاسىپكەر ك. بۇل ۇسىنىستان باس تارتقان. بىرنەشە ۋاقىتتان سوڭ ايىپتالۋشى «ديپلومات» قىزمەتكەرلەرىنە ءوزىن وسى كەشەن يەلەرىنىڭ ءبىرى رەتىندە كورسەتىپ، ولاردان جشس ديرەكتورىن قوناقۇيگە كىرگىزبەۋىن تاپسىرعان. دەرەكتەرگە ساي، ارتىنشا مۇحامەديۇلى سەرىكتەستىك قاتىسۋشىلارىنىڭ جينالىسىن ۇيىمداستىرىپ، حاتتامانى قولدان جاساپ، جشس باسشىسى اتانادى.
سوتتا ۇلتتىق مۋزەيدىڭ بۇرىنعى باسشىسى وزىنە تاعىلعان ايىپپەن كەلىسپەدى.
ەسكە سالايىق، 2023 جىلدىڭ 20 ماۋسىمىندا بايقوڭىر اۋدانىنىڭ №2 سوتىندا ارىستانبەك مۇحامەديۇلى قىلمىستىق كودەكستىڭ 28-بابى 3-بولىگى جانە 189-بولىگى 4-تارماعى 2-تارماعى بويىنشا قۇقىق بۇزۋشىلىق جاساعانى ءۇشىن 8 جىلعا سوتتالعان ەدى.
2023 جىلدىڭ 14 قىركۇيەگىندە استانانىڭ اپەللياتسيالىق سوت القاسى بۇرىنعى مادەنيەت جانە سپورت مينيسترىنە قاتىستى سوت ۇكىمىن وزگەرىسسىز قالدىردى.
