Burynǵy mádenıet jáne sport mınıstri, Ulttyq mýzeıdiń eks-dırektory Arystanbek Muhamedıulyna «Dıplomat» qonaqúıin zańsyz ıemdendi degen aıyp taǵyldy. Is elordanyń qylmystyq ister jónindegi aýdanaralyq sotynda qaralyp jatyr, dep habarlaıdy «Adyrna» tilshisi.
Eks-mınıstrge Qylmystyq kodekstiń 24-baby 3-bóligi – 249-baby 1-bóligi (reıderlik áreketke oqtalý), 28-baby 3-bóligi – 250-baby 1-bóligi (ókiletin teris paıdalaný arqyly qylmystyq quqyq buzýshylyqty uıymdastyrý) boıynsha aıyptalyp otyr.
Aıyptaý qorytyndysy boıynsha, 2019 jyly «Dıplomat» qonaqúıine ıelik etip otyrǵan K. esimdi kásipker Muhamedıulynan óziniń qonaqúıindegi máselelerdi sheshý úshin materıaldyq kómek suraǵan. Sottalýshy oǵan 2,5 mlrd teńge berýge kelisken, biraq mundaı kómek úshin ol senimdi tulǵa enesiniń atyna bıznestiń 71%-yn resimdeýdi talap etken. Osylaısha eks-mınıstr qonaqúıdi tolyq ıemdenip almaq bolǵan.
Kelisimge qol qoıylǵan soń Muhamedıuly qonaqúıge jıi keletin bolǵan. Keıin ol qonaqúıdiń qalǵan 29% bóligin berýdi suraǵan. Alaıda kásipker K. bul usynystan bas tartqan. Birneshe ýaqyttan soń aıyptalýshy «Dıplomat» qyzmetkerlerine ózin osy keshen ıeleriniń biri retinde kórsetip, olardan JShS dırektoryn qonaqúıge kirgizbeýin tapsyrǵan. Derekterge saı, artynsha Muhamedıuly seriktestik qatysýshylarynyń jınalysyn uıymdastyryp, hattamany qoldan jasap, JShS basshysy atanady.
Sotta Ulttyq mýzeıdiń burynǵy basshysy ózine taǵylǵan aıyppen kelispedi.
Eske salaıyq, 2023 jyldyń 20 maýsymynda Baıqońyr aýdanynyń №2 sotynda Arystanbek Muhamedıuly Qylmystyq kodekstiń 28-baby 3-bóligi jáne 189-bóligi 4-tarmaǵy 2-tarmaǵy boıynsha quqyq buzýshylyq jasaǵany úshin 8 jylǵa sottalǵan edi.
2023 jyldyń 14 qyrkúıeginde Astananyń apellıaııalyq sot alqasy burynǵy mádenıet jáne sport mınıstrine qatysty sot úkimin ózgerissiz qaldyrdy.
