ارمەنيانىڭ ۇجىمدىق قاۋىپسىزدىك شارتى ۇيىمىمەن (ۇقشۇ) قارىم-قاتىناسىنىڭ ناقتى توقتاۋى، ارمەنيانىڭ ۇقشۇ-دا تۇراقتى وكىلىنىڭ جوقتىعىن بىلدىرەدى. بۇل تۋرالى پارلامەنت ساعاتىندا ارمەنيا پرەمەر-ءمينيسترى نيكول پاشينيان مالىمدەدى، دەپ حابارلايدى “ادىرنا” ۇلتتىق پورتالى Tengrinews.kz-كە سىلتەمە جاساپ.
«ءبىر جىلدان بەرى بىزدە ۇقشۇ-دا تۇراقتى وكىل بولعان جوق. ءبىز ۇقشۇ ءىس-شارالارىنا كوپتەن بەرى جوعارى دەڭگەيدە قاتىسپادىق. ۇقشۇ-دا شەشىم قابىلداۋدا كونسەنسۋس ءپرينتسيپى بار، بىراق ءبىز قاتىسپايمىز. قاراپايىم سەبەپپەن، بىزدە «نەگە قاتىسۋ كەرەك» دەگەن سۇراققا جاۋاپ جوق»، - دەدى پاشينيان ارمەنيانىڭ ۇيىمعا قاتىسۋىن توقتاتۋ نەنى بىلدىرەدى دەگەن سۇراققا جاۋاپ بەرىپ.
ونىڭ ايتۋىنشا، ەگەر ۇيىم ءوز مىندەتتەمەلەرىن ورىنداماسا، ەرەۆان ۇقشۇ-عا مۇشەلىگىن زاڭدى تۇردە توقتاتادى.
«ەگەر ءبىز ءىس جۇزىندە ءىس-ارەكەتىمىزدى توقتاتقان بولساق، وندا ماسەلەلەر شەشىلمەسە، ءبىز ونى دە-يۋرە جاسايمىز»، - دەدى پرەمەر-مينيستر.
پاشينيان ەرەۆاننىڭ ۇيىمعا قوياتىن باستى سۇراعى مىنادا ەكەنىن اتاپ ءوتتى: ارمەنياداعى ۇقشۇ-نىڭ جاۋاپكەرشىلىك سالاسى قانداي؟
«ءبىز ۇقشۇ-عا سۇراق قويدىق، بۇگىنگە دەيىن جاۋاپ العان جوقپىز. ال بۇل سۇراققا جاۋاپتىڭ بولماۋى، ءبىزدىڭ ويىمىزشا، ارمەنيا رەسپۋبليكاسىنىڭ ۇلتتىق قاۋىپسىزدىگى مەن اۋماقتىق تۇتاستىعىنا قاۋىپ توندىرەدى»، - دەدى ول.
پاشينيان 23 اقپاندا France24 تەلەارناسىنا بەرگەن سۇحباتىندا ارمەنيانىڭ ۇقشۇ-عا قاتىسۋىن توقتاتقانىن مالىمدەدى. ارمەنيا پرەمەر-ءمينيسترىنىڭ ايتۋىنشا، ۇجىمدىق قاۋىپسىزدىك شارتى ەرەۆانعا قاتىستى، اسىرەسە، 2021-2022 جىلدارى ورىندالمادى جانە ەل بۇعان نازاردان تىس قالدىرا المادى. وسىعان بايلانىستى ارمەنيانىڭ كەلىسىمگە قاتىسۋى ۋاقىتشا توقتاتىلدى.
ايتا كەتەيىك، ۇقشۇ-عا التى مەملەكەت كىرەدى: ارمەنيا، بەلارۋس، قازاقستان، قىرعىزستان، رەسەي جانە تاجىكستان.