پاكىستاننىڭ لاحور قالاسىندا ونداعان ادام ايەلدىڭ كويلەگىندەگڭ ارابشا جازۋدى قۇران اياتتارى دەپ قاتەلەسىپ، شابۋىل جاساعان. اشۋعا بۋلىققان حالىق ايەلدىڭ باسىن الماق بولدى. بۇل تۋرالى BBC جازدى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، كويلەكتە اراب تىلىندە "حالۋا", ياعني ء"تاتتى" دەگەن ءبىر عانا ءسوز بولعان.
پاكىستان پوليتسياسىنىڭ حابارلاۋىنشا، جەكسەنبى كۇنى پەندجاب پروۆينتسياسىنىڭ استاناسى لاحور قالاسىنداعى مەيرامحانالاردىڭ بىرىندە تۇتىنۋشى ايەلدىڭ ماڭىنا بىرنەشە ەر ادامنىڭ جينالعانى تۋرالى حابار كەلىپ تۇسكەن. پوليتسيا قىزمەتكەرى سەيدا شەحربانو عيماراتتىڭ جانىنان 300-گە جۋىق ادامدى كورگەنىن ايتادى.
الەۋمەتتىك جەلىلەردە بىرنەشە ۆيدەو جاريالاندى. بەينەجازبادا مەيرامحانانىڭ بۇرىشىندا بەتىن قولىمەن جاۋىپ، قورقىپ تۇرعان ايەلدى انىق كورۋگە بولادى. تاعى ءبىر ۆيدەودا ايەلدى پوليتسيا قىزمەتكەرلەرى قورشاپ، قالىڭ توپتان قورعاپ، ۇستىندەگى جازۋى بار كويلەگىن شەشۋدى تالاپ ەتەدى.
ءتىپتى، ادامداردىڭ قۇدايعا ءتىل تيگىزگەن ايەلدىڭ باسىن كەسۋدى سۇراعانى كورسەتىلگەن.
ايتا كەتسەك، پاكىستان زاڭى بويىنشا قۇدايعا ءتىل تيگىزگەن ادام ءولىم جازاسىنا كەسىلەدى.
پوليتسيا قىزمەتكەرى مەيرامحانانىڭ كىرەبەرىسىندە تۇرىپ، ادامداردى تىنىشتاندىرۋعا تىرىسقان، كەيىن ايەلدى وزدەرىمەن بىرگە الىپ كەتكەن. جينالعاندار اراسىندا پاكىستاننىڭ وتە كونسەرۆاتيۆتى يسلامشىل پارتيالارىنىڭ ءبىرىنىڭ جاقتاستارى بولعان.
قۇدايعا ءتىل تيگىزدى دەگەن كۇدىككە ىلىنگەن ايەل پوليتسيا بولىمشەسىنە جەتكىزىلدى. وندا شاقىرىلعان بىرنەشە يسلام ءدىنتانۋشىلارى ونىڭ كيىمىندەگى ءماتىننىڭ قۇرانعا ەش قاتىسى جوق ەكەنىن راستادى.
پوليتسيا ءتىپتى يسلام عۇلامالارىنان ايەلدىڭ كىناسىزدىگىن راستايتىن بەينە حابارلاما جازۋدى سۇرادى. ال ايەلدىڭ ءوزى بولعان وقيعا ءۇشىن كەشىرىم سۇرادى.
"مەنىڭ جامان نيەتىم بولعان جوق. مۇنىم قاتە بولدى. بىراق بولعان جاعداي ءۇشىن كەشىرىم سۇرايمىن. مۇنداي جاعداي قايتالانباس ءۇشىن قولدان كەلگەننىڭ ءبارىن جاسايمىن", – دەدى ايەل.
ول ءوزىنىڭ ءدىندار مۇسىلمان ەكەنىن جانە يسلامدى قورلايتىن ەشتەڭە جاسامايتىنىن ايتتى.
